Astanada jel uıytqyp tur: TJD azamattardy abaı bolýǵa shaqyrdy

ASTANA. KAZINFORM — Astana qalasy TJD aýa raıynyń qolaısyzdyǵyna baılanysty jazataıym oqıǵa bolmas úshin elorda turǵyndary men qala qonaqtarynan qaýipsizdik sharalaryn saqtaýdy suraıdy, dep habarlaıdy qala ákimdiginiń resmı saıty.

«Qazgıdromet» RMK derekteri boıynsha 6-7 qarasha kúnderi qatty jel soǵady. Ońtústik-batystan soǵatyn jeldiń ekpini 23-28 m/s, keı ýaqyttarda 30 m/s bolady dep boljanyp otyr.

Osyǵan baılanysty Astana qalasy TJD qatty jel kezinde jaraqat almaý úshin azamattarǵa qaýipsizdik sharalaryn saqtaýdy usynady: 

• ǵımarattardan shyǵýǵa asyqpańyz (múmkindiginshe úı-jaılarda bolyńyz); 
• balalardy erekshe baqylaýǵa alyńyz jáne olardy qaraýsyz qaldyrmaý mańyzdy; 
• eger qatty jel kezinde syrtta bolsańyz, jaqyn mańdaǵy kireberisti nemese dúkendi panalańyz; 
• úılerdiń qabyrǵalaryna jaqyn jerde qatty jelden jasyrynbańyz, óıtkeni shatyr materıaldary qulap ketýi múmkin; 
• qoǵamdyq kóliktiń ashyq aıaldamalarynda, bılbordtardyń astynda, aǵashtarda, qurylysy aıaqtalmaǵan ǵımarattarda jasyrynýǵa bolmaıdy; 
• qatty jel kezinde elektr jelisiniń astynda turyp, úzilgen elektr symdaryna jaqyndaý óte qaýipti; 
• jeke avtokólikti aǵashtardan qaýipsiz qashyqtyqta qoıý usynylady.

Tótenshe jaǵdaılar kezinde 101 jáne 112 nómirine habarlasý qajet.