Astanada jekpe-jek óneriniń ekinshi festıvali aıaqtaldy (FOTO)
ASTANA. QazAqparat - Astanada erejesiz jekpe-jek boıynsha jattyqtyrýdy aralas stıldegi kásipqoı sportshy, jekpe-jekterge Ultimate Fighting Championship qoldaýymen shyǵatyn kópshiliktiń súıiktisi Habıb Nýrmagomedov ótkizdi.
«Men bul festıvalge birinshi ret kelip otyrmyn. Budan keıin de birlese jumys isteımiz degen úmittemin»-deıdi belgili sportshy.
Mádenıet basqarmasy habarlaǵandaı, Astananyń 18 jyldyǵyna arnalǵan jekpe-jek óneriniń ekinshi festıvali aıaqtaldy. Festıval «Dáýlet» ulttyq tennıs ortalyǵynda ótti. Sport saıysyna djıý-djıtsý, karate, qoıan-qoltyq urys, sambo jne taǵy 7 jekpe-jek túrinen qara úzgen sheberler qatysqan. Kórneki 11 jekpe-jekte Qazaqstan, Reseı, Qytaı, Italııa, Japonııa men Fılıppınniń belgili sportshylary synǵa tústi.
Bul festıvalge bas-aıaǵy 4 elden 250 sportshy qatysty. Bıyl uıymdastyrýshylardyń da kórermen qaýymǵa tosyn syıy kóp boldy.
Mysal úshin qonaqtarǵa naǵyz japon sýmosyn nemese pekıtı-tırsııa kalı qarýyn qalaı qoldanatynyn kórý kórý múmkindigi berildi. Sondaı-aq tizimge byltyrǵy jyly bolmaǵan birneshe dıstsıplına engizilgen.
Shaqyrtylǵan sportshylar barlyq sport federatsııalarynda birneshe kún boıy tegin sheberlik synyptaryn ótkizdi.
Halyqaralyq vın-chýn (IWCO) federatsııasynyń qurmetti prezıdenti Sıfý Donald Mak astanalyqtarǵa vın-chýn tehnıkasyn úıretti.
Donald Mak óz sózinde: «Sizderdiń elderińizge alǵash ret kelip turmyn. Maǵan bári unady. Astanalaryńyzǵa tańqaldym, jas ári ádemi qala. Festıval óte joǵary deńgeıde ótti. Bul is-shara paıdaly jáne óskeleń urpaqqa úlgi bolady. Olardyń sportpen shuǵyldanýy, salaýatty ómir saltyn ustanýy mańyzdy. Qazaqstandyqtar qaıyrymdy ári qonaqjaı. Men buny sezindim. Sondyqtan barlyǵyna baqyt pen jaqsylyq tileımin»-dep aǵynan jaryldy.
Taı boksynan álem jáne Eýropa chempıony atanǵan Artem Levın osy jekpe-jek óneriniń artyqshylyqtarymen bólisti. Búgin sportshy áýesqoılar arasyndaǵy taı boksynan álem chempıony, kásibı boksshy Dáýlet Otarbaevpen elordadaǵy sport mektepteriniń oqýshylary úshin sheberlik synybyn ótkizedi. «Qazaq Batyry» jekpe-jek akademııasynda saǵat 18:00-de ótetin bul sharany kez kelgen adam tamashalaı alady.
Festıvalge qatysýshylar mundaı aýqymdy sharanyń uıymdastyrylý deńgeıin joǵary baǵalap, osyndaı eńbektiń arqasynda Astanada jekpe-jek óneriniń jańa qarqyn alyp kele jatqanyn aıtýda.
