Astanada jekemenshik jáne memlekettik balabaqsha baǵasyn teńestirý múmkinshiligi qarastyrylýda
ASTANA. QazAqparat - Elordada memlekettik demeýqarjy alatyn jekemenshik balabaqshaǵa baratyn bala jalpy kezekten shyǵarylatyn bolady. Bul týraly búgin Astana qalalyq bilim basqarmasynyń basshysy Ánýar Janǵozın málim etti, dep habarlaıdy QazAqparat.
«Jekemenshik balabaqshaǵa qatysty bir ózgeris bar. Atap aıtqanda, eger siz memlekettik tapsyrys alatyn jekemenshik balabaqshany tańdaıtyn bolsańyz, onda memlekettik balabaqsha tiziminen shyǵarylasyz»,- dedi ol.
Buǵan deıin ata-analar balalaryn memleketten demeýqarjy alatyn jekemenshik balabaqshalarǵa balalaryn berip, kezegi kelgende memlekettik mektepke deıingi bilim berý uıymyna aýystyra alatyn.
«Qazirgi ýaqytta bizde memlekettik demeýqarjy alatyn 181 jekemenshik balabaqsha bar. Olardyń barlyǵy da tizimde bolady jáne árbir ata-ana ózi tańdaý jasaı alady. Eger memlekettik balabaqsha tańdaý múmkindigi bolmasa, onda ol ornalasqan jeri yńǵaıly jekemenshik balabaqshany tańdap, joldamaǵa ıe bolady. Biraq, bul rette ol kezekten shyǵarylady», - dedi Ánýar Janǵozın.
Onyń sózine qaraǵanda, memlekettik demeýqarjy Astana qalalyq bilim basqarmasyna sáıkesinshe ótinimmen júgingen jekemenshik balabaqshalarǵa ǵana beriledi.
«Mektepke deıingi uıymdar jelisin damytý jekemenshik balabaqshalarǵa memlekettik tapsyrys arqyly júzege asyrylady. Sonyń arqasynda sońǵy jyldary jekemenshik balabaqshalardyń sany aıtarlyqtaı ósip otyr. Bul bir jaǵynan bızneske de qoldaý. Qazirgi ýaqytta jekemenshik balabaqshalar quny 20800, al memlekettik balabaqsha 16800 teńgeni quraıdy. Memlekettik balabaqshada tamaqqa qana tólense, jekemenshik balabaqshada tamaqpen qosa qandaı da bir qosymsha qyzmetter bolady», - dedi basqarma basshysy.
Ánýar Janǵozınniń aıtýynsha, jekemenshik jáne memlekettik balabaqsha baǵasyn teńestirý múmkinshiligi qarastyrylýda. Degenmen, ol bıýdjettiń múmkinshiligine baılanysty.
