Astanada jeke úıge gaz tartý máselesi qalaı júrgiziledi
«Birinshi kezeń boıynsha jobalaý jumysy aıaqtaldy. Qosý keshenderin bizdiń JEO-ǵa tartýdy kózdep otyrmyz. Kóktal-1 jáne Kóktal-2 aýdandaryna gaz tartylady. 2021 jyldan keıin biz ekinshi kezeńdi iske asyrýdy kózdep otyrmyz. ıAǵnı, ol boıynsha Mıchýrıno, Internatsıonalnyı, Telman, Garden Village jáne Family Village kentterine gaz tartylady. Úshinshi kezeń aıasynda Ilınka, Shubary shaǵyn aýdany men Óndiris turǵyn úı massıvine gaz tartýdy josparlap otyrmyz», - deıdi Astana qalasynyń otyn-energetıkalyq kesheni jáne kommýnaldyq sharýashylyǵy basqarmasy otyn-energetıkalyq resýrstar bóliminiń basshysy Maqsat Esmaǵulov baspasóz máslıhatynda.
Tilshilerdiń suraǵyna jaýap bere otyryp, bólim basshysy jeke úılerdiń ıelerine gazdy óz aqshasy esebinen tartatynyn atap ótti.
«Kez kelgen ınjenerlik ınfraqurylym nysany sekildi munyń bári de tehnıkalyq sharttarǵa sáıkes bolady. Gaz tartý jumysy energııa men sý tartý júıesine uqsas: biz tek negizgi jelilerdi tartamyz, ıaǵnı gaz jelileri negizgi kóshelerde bolady. Al jeke úıge gaz tartý máselesi úılerdiń ornalasýyna qaraı belgilenedi», - deıdi ol.
Sonymen birge, spıker óz sózinde gaz qurylǵylaryn ornatý barysynda qaýipsizdikke kimniń jaýapty ekenin aıtyp berdi.
«Qazaqstanda kóptegen óńirlerge gaz tartylǵan. BQO, OQO óńirlerin bul rette úlgi retinde aıta ketýge bolady. Ol jaqta gaz tartý jumysyn qurylys-montajdaý jumysyn júrgizip júrgen arnaıy uıymdar oryndaıdy. Eń aldymen, ruqsat alý kerek», - deıdi Maqsat Esmaǵulov.
