Astanada jedel járdem stantsııasynan 850 mln teńgeni urlaý shemasy anyqtaldy

ASTANA. KAZINFORM — Elorda prokýratýrasy Astana qalasy boıynsha UQK-niń departamentimen birlesip 2020-2023 jyldar aralyǵynda jedel medıtsınalyq járdem stantsııasynyń bıýdjet qarajatyn jymqyrý shemasynyń jolyn kesti. Bul týraly Bas prokýratýra málim etti.

Arnaıy prokýrorlardyń basshylyǵymen vedomstvoaralyq jedel-tergeý toby quryldy. Prokýrorlar sanıtarlyq avtokóliktiń bólshekterin zańsyz esepten shyǵarý jáne jalǵan qyzmet kórsetý sharttaryn jasasý faktilerin anyqtady.

Sonyń nátıjesinde jumys isteıtin avtokólikterdiń sany azaıyp, qalǵandary qosalqy bólshekterdi jymqyrý saldarynan paıdalanýdan shyǵarylǵan.

— Qazirgi ýaqytta «103» avtoparki tolyǵymen qalpyna keltirildi.  4 qyzmetker, onyń ishinde 2 orta býyndy basshylar men stantsııa dırektory ustaldy. Kórsetilgen tulǵalardyń áreketterinen memleketke 850 mln. teńge somasynda asa iri zalal keltirilgen, — delingen habarlamada.

Olardyń is-áreketteri Qylmystyq kodekstiń «Kinálige senip tapsyrylǵan bóten múlikti adamdar tobynyń aldyn ala sóz baılasýymen, óziniń qyzmet babyn paıdalana otyryp jasaǵan asa iri mólsherde birneshe ret ıemdenip alý», ıaǵnı QK-niń 189-baby 4-bóligi 2) tarmaǵy, 189-baby 3-bóligi 1), 2), 3) tarmaqtary boıynsha saralandy.

Qylmystyq is sotqa joldandy. 

Buǵan deıin BQO-da Memlekettik kiris departamentiniń basqarma basshysy paramen ustalǵanyn jazdyq.