Astanada jedel járdem kólikterine beınebaqylaý ornatylady
ASTANA. KAZINFORM — Astanada jedel járdem kólikterin zamanaýı beınebaqylaý júıelerimen jabdyqtaý jobasy bastaldy, dep habarlaıdy qala ákimdiginiń baspasóz qyzmeti.
Bul bastama dárigerler men patsıentterdiń qaýipsizdigin qamtamasyz etýge baǵyttalǵan.
Sońǵy 3 jylda elordada jedel járdem brıgadalaryna 66 ret shabýyl jasalǵan. Osyǵan baılanysty qala ákimdigi barlyq sanıtarlyq avtokólikti beınetirkeý keshenderimen jabdyqtaý týraly sheshim qabyldady.
— Qazirgi tańda barlyq deńgeıde medıtsına qyzmetkerleriniń qyzmet barysynda qaýipsizdigin qamtamasyz etýge úlken kóńil bólinýde. Búginde alǵashqy kólik tórt kameramen, GSM modýli bar beınetirkeý qurylǵysymen jáne beıneni naqty ýaqyt rejıminde jetkizetin monıtorymen jabdyqtaldy. Beıneaǵyn jedel járdem dıspetcherlik qyzmetine de, Polıtsııa departamentiniń Jedel basqarý ortalyǵyna da jetkiziledi. Bul tótenshe jaǵdaılarǵa jedel áreket etýge jáne kólik ishinde de, syrtynda da bolyp jatqan jaǵdaıdy baqylaýǵa múmkindik beredi, — dep habarlady qalalyq Qoǵamdyq densaýlyq saqtaý basqarmasy.
Jyl sońyna deıin 100 jedel járdem kóligin beınebaqylaý júıelerimen jabdyqtaý josparlanyp otyr.
Jobaǵa qatysty pikirin qalalyq jedel medıtsınalyq járdem qyzmetiniń ókilderi de bildirdi. Astana qalalyq jedel medıtsınalyq járdem stantsııasy dırektorynyń orynbasary Arman Baıanbaev ujym kórsetilip otyrǵan qoldaýǵa rızashylyqpen qaraıtynyn atap ótti.
— Bul joba medıtsına qyzmetkerleri men naýqastardyń qaýipsizdigin arttyrýǵa jasalǵan mańyzdy qadam. Sonymen qatar, atalǵan tehnologııa jedel járdem kólikteriniń qatysýymen bolatyn jol-kólik oqıǵalarynyń azaıýyna oń áser etedi, — dedi ol.
Atalǵan bastama Astana qalasynyń «Tsıfrlandyrý jáne memlekettik qyzmetter basqarmasy» memlekettik mekemesiniń qoldaýymen júzege asyrylyp jatyr.
Eske sala keteıik, medıtsına qyzmetkerlerine jasalǵan shabýyldar jıilep ketkennen keıin Memleket basshysy olardyń qaýipsizdigin kúsheıtýdi jáne quqyqtaryn qorǵaýdy tapsyrǵan bolatyn.
Budan buryn Astana dúkenderine reıd júrgizilip, tyıym salynǵan zattar tárkilengenin jazǵan edik.