Astanada jedel medıtsınalyq járdemniń ózekti máselelerine arnalǵan konferentsııa ótýde
ASTANA. 5 qarasha. QazAqparat /Qanat Mámetqazyuly/ - Búgin elordada «Jedel medıtsınalyq járdemniń ózekti máseleleri» atty halyqaralyq ǵylymı praktıkalyq konferentsııa óz jumysyn bastady. Alqaly jıynǵa shuǵyl jáne jedel járdem kórsetý salasyndaǵy 200-den astam mamandar, onyń ishinde AQSh, Reseı, Germanııa, Izraıl, Qytaı jáne taǵy basqa sheteldik tájirıbeli mamandary qatysýda.
Resmı derekterge qaraǵanda, jedel kómekter kórsetý jaǵdaıy búgingi zamannyń eń ózekti máseleleriniń birine aınalyp otyr jáne ólim-jitimniń oryn alýyna qatysty basty sebepter de jedel járdemniń kórsetilýine tikeleı baılanysty bolatyn kórinedi. Máselen, Dúnıejúzilik densaýlyq saqtaý uıymynyń málimetterine qaraǵanda, ólimmen aıaqtalatyn jaǵdaılardyń ishinde shuǵyl patologııadaǵy jan tásilimder 1-shi orynda tur eken. Sonymen qatar, 40 jasqa deıingi azamattardyń basym bóligi de osy jedel járdemniń jetispeýshiligi sebebinen qaza bolatyny aıtylady.
«Bundaı halyqaralyq konferentsııa Qazaqstanda alǵash ret uıymdastyrylyp otyr. Ony uıymdastyrýdaǵy basty maqsat - osy saladaǵy ózekti máselelerdi talqylap, tájirıbeli mamandarmen pikir almasý. Sondyqtan da, sheteldik mamandardy keńinen tartýǵa tyrystyq. Jalpy, jıyn barysynda atalmysh salada qyzmet etetin mamandardyń kásibı biliktiligin arttyrýǵa nazar aýdarylyp, onyń ishinde ınnovatsııalyq tehnologııalardy qoldaný salasynda bilimdi jetildirýge aıryqsha mán beriledi. Budan bólek, jedel medıtsınalyq járdemniń normatıvtik-ádistemelik bazasyn qurý, uıymdardy zamanaýı jabdyqtarmen jaraqtandyrý sharalaryn talqylaıtyn bolamyz», - dedi «Respýblıkalyq jedel medıtsınalyq járdem ǵylymı ortalyǵy» AQ Bas dırektory Nurlan Qasymov.
Sondaı-aq, shara barysynda «Jedel járdem» ǵylymı-aqparattyq jurnalyn shyǵarý týraly áńgime bolyp, sapaly medıtsınalyq qyzmet kórsetýdi qamtamasyz etýge qatysty talqylaýlar ótti.
