Astanada jedel medıtsınalyq kómek shaqyrtýǵa taksı paıdalanatyn bolady
ASTANA. QazAqparat - Astanada jedel medıtsınalyq kómek shaqyrtý qyzmetin kórsetý úshin taksı paıdalanylatyn bolady. Bul týraly qalalyq ákimdikte ótken brıfıngte «Astana qalasy Densaýlyq saqtaý basqarmasy» MM basshysynyń orynbasary Ivan Lı habarlady.
«Biz Túrkııada, Ystambulda tájirıbeni zerdeledik. Onda arnaıy mashınalar joq, olar jedel járdemge kádimgi jeńil kólikti jaldaıdy da dáriger nemese feldsherdi osy jeńil kólikpen jiberedi. Eksperıment tártibinde 2 naýryzdan bastap biz osy baǵdarlamany engizemiz. Qazir baıqaý ótkizdik. 2 naýryzdan bastap jeńimpazdy anyqtaımyz. Alǵash ret 25 kólikti - 7 jergilikti taksıdi jedel járdemge tartamyz», - dedi I. Lı.
Onyń aıtýynsha, densaýlyq saqtaý basqramasynda mundaı ózgeristen keıin jedel járdem jumysynyń kórsetkishteri jaqsarady.
I. Lı sondaı-aq 1 jáne 2 sanatty shaqyrtýlar - bala týý, júrek talmasy, aýyr jaraqattar men basqa da jaǵdaılarǵa qyzmet kórsetýi úshin arnaıy sanıtarlyq kólik qajet. Ol barlyq shaqyrtýdyń nebári 30 paıyzyn ǵana quraıdy. Tutastaı, 871 myńǵa jetken Astana halqyna qyzmet kórsetý úshin 90 kólik kerek, al densaýlyq saqtaý basqarmasynda olardyń sany bar bolǵany - 52.
