Astanada jedel avtobýstar jelisi quryla bastady
ASTANA. QazAqparat - Astanada jolaýshylar avtobýsynyń jyldamdyq júıesi boıynsha jobanyń qurylysy bastaldy. Osynyń arqasynda turǵyndarǵa jaıly qoǵamdyq kólik usynylady jáne jol qozǵalysyn uıymdastyrý jaqsartylady, dep habarlady elordalyq ákimdiktiń baspasóz qyzmetinen.
«BRT - jyldam júretin avtobýstardyń kólik júıesi. Jolaýshylarǵa arnalǵan jedel avtobýstar arnaıy salynǵan jol jolaqtarymen júredi. BRT Astana qalasynyń halyqaralyq áýejaıy, EKSPO qalashyǵy, Ábý-Dabı Plaza men jańa temirjol vokzalynyń arasyn qosady», delingen habarlamada. Jańa júıe beton jabyndy arnaıy trassa, tirshilikti qamtamasyz etý keshenderimen jabdyqtalǵan jabyq stansalar, qaýipsizdik júıeleri, jolaqysyn elektrondy tóleý júıesi, eskalatorlar men lıftter, sondaı-aq depo men jyljymaly sostavtan turady.
Negizgi júretin joldan bólektelgen BRT avtobýstary júretin arnaıy joldar jabyq jolaýshylar stansalarymen jáne jerasty jótkelderimen jabdyqtalady. Naqtylanǵan qozǵalys ýaqyty aralyǵynda baǵyt ereksheligine sáıkes jolaýshylar syıymdylyǵy asa úlken avtobýstar júretin bolady.
Atap ótilgendeı, jolda júrý bıletteri metro prıntsıpi boıynsha satylady. Jolaýshylardyń kólikten shyǵý jáne kirýi esebinen de qozǵalys ýaqyty qysqarady.
Atap ótý kerek, BRT jelisiniń birinshi kezeginde 18 stansa salynady.
