Astanada jebe pishindes muz aıdyny ashyldy
ASTANA. QazAqparat - Astanadaǵy jyly aýa-raıyna baılanysty ashyq aspan astynda muz aıdyndaryn quıý múmkin bolmady. Soǵan qaramastan búgin EXPO aımaǵynda alǵashqy muz aıdyny ashyldy.
Onyń astynda ornatylǵan tońazytqysh quraldarynyń kómegimen muzdy sáýir aıyna deıin ustap turýǵa múmkindik bar, dep xabarlaıdy QazAqparat tilshisi.
Muz aıdyny týra "Nur Álem" pavılony janynda ornalasqan. Sý burqaqtar qorshalyp, astyna tońazytqysh tútikteri júrgizildi. Sóıtip, ústine muz quıyldy. Aýdany - 4 myń sharshy metr. Oǵan bir ýaqytta 700 adam kirip, konkı tebe alady. Uıymdastyrýshylardyń aıtýynsha, muz aıdynynyń pishini jebege, naqty aıtsaq, jebeniń ushyna uqsaıdy. Qaq ortasynda EXPO-nyń logotıpi beınelengen.
"Muz aıdynynyń astynda ornalasqan tońazytqysh quraldarynyń kómegimen muzdy +10 gradýsqa deıin ustap turýǵa múmkindik bar. Osynyń arqasynda biz syrǵanaý maýsymyn kelesi jyldyń sáýir aıyna deıin uzarta alamyz. Al muzdyń sapasyn saqtaý úshin arnaıy mashınalar qoldanylady", - deıdi jobaǵa jaýapty kompanııanyń ókili Erlan Úmbetov.
"Astana EKSPO-2017" ulttyq kompanııasy taratqan málimetke sáıkes, atalǵan jobaǵa bıýdjet aqshasy jumsalǵan joq. Bul - kompanııanyń óz qarajaty. Muz aıdynyna 300 mln teńge jumsaldy. Oǵan kirý de arzan emes. Konkıdi 1000 teńgege jalǵa alǵannan keıin muz aıdynyna kirý úshin taǵy 1000 teńge tóleý kerek. Degenmen, zeınetkerler men oqýshylar úshin 50 paıyzdyq jeńildik qarastyrylǵan. Al 6 jasqa deıingi balalar tegin kire alady. Biraq kishkentaı balalar ustap júretin pıngvın sııaqty qosymsha aksessýarlardy alǵany úshin aqsha shyǵarýǵa týra keledi.
Aıta ketken jón, muz aıdynynyń ashylýyna baılanysty erteńge deıin barlyq kelýshiler úshin 50 paıyzdyq jeńildik qarastyrylǵan.
