Astanada jazýshy Tólen Ábdikulynyń 70 jyldyq mereıtoıyna arnalǵan shyǵarmashylyq kesh ótti

Mereıtoı ıesiniń keshin qyzyqtaýǵa, ulyqtaýǵa, quttyqtaýǵa jazýshynyń zamandas aqyn-jazýshylary Ábdijámil Nurpeıisov, Farıza Ońǵarsynova, Myrzataı Joldasbekov depýtat Qýanysh Sultanov jáne qazaqtyń zııaly qaýymy men jaqsy-jaısańdary túgel jınaldy. Qazaqtyń «Qosbasar» kúıimen ashylǵan kesh bir saryndylyqtan ada, stsenarııden taza, bir proza, bir poezııaǵa kezek berip, tabıǵı kúıde órbidi. Ómir jolyn kórkem shyǵarmadan bastap, 90-jyldardan keıin memlekettik isterge den qoıǵan Tólen Ábdikulynyń mereıli mereıtoıyna elimizdiń túkpir-túkpirinen quttyqtaýlar aǵylyp keldi. Munyń ózi qalamgerdiń ǵana qýanyshy emes, búkil eldiń toıy ekenin ańǵartqandaı. Shara barysynda QR Mádenıet jáne aqparat mınıstri Darhan Myńbaı QR Prezıdenti Nursultan Nazarbaevtyń quttyqtaýyn oqyp, Elbasynyń arnaıy syılyǵy - altyn qolsaǵat tabys etti.

«Qurmetti Tólen Ábdikuly! 70 jasqa tolǵan mereıtoıyńyz qutty bolsyn! Siz ómir shyndyǵyn dara qoltańbańyz boıynsha sheber beınelep, oqyrmannyń shynaıy qurmetine bólengen, esimińiz kópshilikke keńinen tanymal qalamgersiz. Adamzatqa ortaq qundylyqtardy kóterip, fılosofııalyq tereń tujyrymdarǵa jáne tosyn sheshimderge qurylǵan oıly shyǵarmalaryńyz ádebıet súıer qaýymdy eshqashan enjar qaldyrǵan emes», - delingen QR Prezıdentiniń quttyqtaý hatynda.

Elbasy N.Nazarbaev sóz arasynda jazýshy T.Ábdikulyn árbir jyldarda halyqaralyq Kafka jáne Qazaqstandaǵy PEN-klýb syılyqtarynyń ıegeri ekendigin eske salyp, «halqymyz  sondaı-aq, Ózińizdi shyǵarmashylyq ujymdarǵa basshylyq jasap, túrli memlekettik jaýapty qyzmetterdi zor abyroımen atqarǵan ultjandy, zııaly azamat retinde de biledi ári qadirleıdi. Solardyń qatarynda el táýelsizdiginiń alǵashqy jyldarynda Qazaqstan Respýblıkasy Prezıdentiniń kómekshisi bolyp, jemisti qyzmet istegen kezińizdi de jaqsy bilemiz», - deı kele: «oqyrmandardy aldaǵy ýaqytta da zamanymyzdyń kókeıkesti máselelerin kóteretin, tereń mazmundy týyndylaryńyzben qýanta beresiz dep senemin. Myqty densaýlyq, áýletińizge amandyq pen ıgilikter, jańa shyǵarmashylyq tabystar tileımin!», - dep atap ótti.  

Tólen Ábdikuly 1942 jyly 4 qyrkúıekte Qostanaı oblysynyń Jangeldın aýdanyndaǵy Eńbek aýylynda týǵan. Ál-Farabı atyndaǵy Qazaq memlekettik ulttyq ýnıversıtetin bitirgen (1965). 1965-1970 jj. «Qazaqstan pıoneri» (qazirgi «Ulan») gazetinde ádebı qyzmetker, bólim meńgerýshisi. 1970-1977 jj. «Jalyn» almanahynda bólim meńgerýshisi, Bas redaktordyń orynbasary, 1977-1979 jj. «Qazaqfılm» kınostýdııasynda Bas redaktor, 1979-1990 jj. Qazaqstan KP Ortalyq komıtetinde jaýapty qyzmette bolǵan. Biraz jyl «Qazaq ádebıeti» gazetiniń Bas redaktory, Qazaqstan Jazýshylar odaǵynyń ekinshi hatshysy bolyp istedi. 1993 jyldan QR Prezıdenti ákimshiliginde jaýapty qyzmette boldy.

Shyǵarmalary 1964 jyldan jarııalana bastady. «Kókjıek» (1969), «Kúzgi japyraq» (1971), «Aqıqat» (1974), «Aıtylmaǵan aqıqat» (1979) áńgime, povester jınaqtaryn, «Óliara» (1985), «Aqshoqyda qys qatty» (1987), «Parasat maıdany» (2002) romandaryn jarııalady. Áńgime, povesteri orys tilinde «Istına» (1980, 1981) degen atpen shyqty. Grek ańyzdary - «Ellada erlerin» (1977) qazaq tiline aýdarǵan.

Halyqaralyq Kafka jáne Qazaqstandaǵy PEN klýb syılyqtarynyń laýreaty (2003). QR Memlekettik syılyǵynyń laýreaty.