Astanada jazýshy Qajyǵumar Shabdanulynyń ómiri men shyǵarmashylyǵyna arnalǵan jıyn ótti
Óziniń qıly zaman keshýlerin, taǵdyr tálkegine moıynusynbaǵan qaısar rýhqa toly ómir shejiresin shyǵarmalaryna arqaý etken dara talant ıesi, jazýshy Qajyǵumar Shabdanulynyń ulaǵatty ómir tarıhyn ári qaraı zerttep, halyqqa keńinen nasıhattaýdy maqsat etken salıqaly basqosýǵa ádebıettanýshy ǵalymdar men tarıhshylar, jazýshynyń urpaqtary, sondaı-aq BAQ ókilderi qatysty.
Jıynda sóz alǵan belgili qoǵam qaıratkeri, aqyn Nesipbek Aıtuly, tarıh ǵylymdarynyń doktory Tursynhan Zákenuly, «Ult birligi» qoǵamdyq qorynyń prezıdenti Baýyrjan Shaqarbekuly sekildi jazýshy, zertteýshiler Qajyǵumar ómiriniń ár kezeńinen syr shertip, jazýshy shyǵarmalaryn qazaq jerinde keńinen nasıhattap, elge tanytýdyń ózektiligin baıan etip, aldymyzdaǵy jyly atap ótiletin jazýshynyń 90 jyldyǵyn sátti uıymdastyrýdyń mańyzdylyǵyna toqtaldy.
Al, jınalysqa Almatydan arnaıy kelgen Jaınar Qajyǵumarqyzy ákesi jaıly áserli áńgime órbitti. Óziniń qolynda jazýshynyń búginge deıin esh jerde jaryqqa shyqpaǵan shyǵarmalarynyń bir toby bar ekendigin aıtty.
Shara sońynda Qajyǵumar Shabdanulynyń kóptomdyq «Qylmys» romanynyń Qazaqstanda tuńǵysh ret basylyp otyrǵan tóte jazýdaǵy nusqasynyń tusaýy kesildi. Talqyǵa qatysqan ǵalymdar shyǵarmanyń tóte jazýmen basylyp shyǵýy qoǵamnyń qajettiliginen týyndap otyrǵandyǵyn, Qazaqstannyń ózinde 1 mıllıonǵa jýyq adam osy jazýdy erkin oqyp biletindigin sóz etti.
Baqytjol Kákesh