Astanada jazýshy Álibek Asqarovtyń «Altaı - altyn besik, ata jurt» kitaby tanystyryldy
ASTANA. Qańtardyń 22-si. QazAqparat /Jasulan Amanbaıuly/ - Qańtardyń 22-si kúni Astanada jazýshy Álibek Asqarovtyń «Altaı - altyn besik, ata jurt» kitabynyń tanystyrylymy ótti,
dep habarlaıdy QazAqparat.
Qazaqstan Respýblıkasy Memlekettik syılyǵynyń laýreaty, kórnekti prozashy, esseshi Álibek Asqarov - týǵan ádebıetimizdiń búgingi bet - beınesin aıqyndaıtyn qalamgerlerdiń biri.
Jazýshynyń «Altaı - altyn besik, ata jurt» kitaby «Kókkól», «Shyndyǵataı», «Muztaý», «Shabanbaı» esse týyndylardan turady. Bul tolǵaý-esseler birin-biri tolyqtyryp, Altaıǵa ǵana tán erekshelikti túısinýge kómektesedi.
«Fılosofııa - tabıǵattyń tereńi» degen sóz bar. Prozanyń tereńine jetip júrgenderdiń biri Álibek Asqarov. Ol prozanyń tereńine qalaı barady?! Ózi óte jaqsy biletin taqyryby - týǵan mekeni, týǵan Altaıy. Álibek memlekettik jumys pen shyǵarmashylyqty qatar atqaryp, sonyń úılesimin taýyp júr», dedi qalamdas dosy, fılosof, senator Ǵarıfolla Esim.
Á. Asqarov - kásibı baspager. Qazaqstan táýelsizdik alǵannan keıingi kezeńdegi baspa isiniń jáne polıgrafııa salasynyń uıymdastyrýshysy.
Onyń týyndylary boıaý qanyqtyǵymen, tabıǵatty keıipteýdegi názik naqyshtarymen daralanady. Elimizdiń órnegi ózgeshe Katonqaraǵaı óńiriniń sóz qyrandary Qalıhan Ysqaqov, Oralhan Bókeev syndy ot aýyzdy, oraq tildi qara sóz sheberleriniń izbasary bola bilgen jazýshy «Qutmeken», «Taıga tolǵaýy», «Jasyl elge saıahat», «Erte túsken bozqyraý», «Ór Altaı, men qaıteıin bıigińdi», «Rodnıkı rojdaıýtsıa v gorah», «Munar taýdy, muzart shyńdy ańsaımyn», «Sotsıalızm áńgimeleri», «Skrıpka solenogo serdtsa» kitaptarynyń avtory.
