Astanada jazǵy lagerler jármeńkesi ótedi
Nur-Sultan. QazAqparat - Búgin M. Ótemisuly atyndaǵy Oqýshylar saraıy janyndaǵy Arbatta jazǵy lagerler jármeńkesi ótedi, dep habarlaıdy QazAqparat qala ákimdigine silteme jasap.
Qalalyq bilim basqarmasynyń qoldaýymen búgin saǵat 10:00 men 19:00 aralyǵynda ata-analar men balalar jazǵy lagerler týraly aqparatty ala alady.
«Jazǵy maýsymda oqýshylardyń belsendi demalysyn, olardy saýyqtyrýdy, bos ýaqytyn tıimdi ótkizýin uıymdastyrý - elordadaǵy bilim berý mekemeleri qyzmetiniń basymdyqty baǵyttarynyń biri. Ár ata-ana óz balasy úshin talǵamyna saı jazǵy lagerdi óz betinshe tańdap, baǵdarlamalarmen, turý jáne tamaqtaný, tasymaldaý jáne qaýipsizdikti qamtamasyz etý jaǵdaılarymen tanysa alady», - delingen habarlamasynda.
Jármeńkege «Discovery», «Bitimger», «Baldáýren» BSL, «Suńqar» BSO, «Zvezdnyı» BSO, «Arman» balalar men jasóspirimder týrızmi ortalyǵy, «Parýs» BSO, «Samuryq» BSO, «Nomads Camp» halyqaralyq kıiz úı lageri, «Juldyz» BSL, «Chaıka» BSL, «Sokol» BSL, M. Ǵabdýllın atyndaǵy demalys kesheni, «Lesnaıa skazka» DOO, «Tulpar» etnıkalyq kıiz úı lageri, «Batyr» shatyrly lageri sııaqty Aqmola oblysynyń balalarǵa arnalǵan jetekshi saýyqtyrý lagerleri qatysady.
