Astanada jazǵy júgirý maýsymy bastaldy
ASTANA. KAZINFORM — Astanada «Zań men tártip» qaǵıdaty jáne «Taza Qazaqstan» ekologııalyq aktsııasy aıasynda «Esil RUN» jazǵy júgirý maýsymynyń saltanatty ashylýy ótti. Sporttyq is-sharaǵa qala turǵyndary men qonaqtary belsendi qatysty. Bul týraly Astana qalasynyń ákimdigi málimdedi.
Jalpy sany 1500-ge jýyq qatysýshy júgirýdi Botanıkalyq saıabaqtan bastap, 4 shaqyrym qashyqtyqty baǵyndyrdy. Jarys buqaralyq sportty damytýǵa jáne turǵyndardy salaýatty ómir saltyna baýlýǵa baǵyttaldy.
– Búgin aýa raıy salqyn bolǵanymen, kóńil kúıimiz óte jaqsy. Qanshama áýesqoı sportshy jınaldy. Mundaı marafondarǵa jylyna birneshe ret qatysamyn. Bıyl qatysý tegin boldy. Salaýatty ómir saltyn ustanatyn barlyq qatysýshylarǵa jáne jeńimpazdarǵa alǵys aıtamyn, – deıdi jarysqa qatysýshylardyń biri Saltanat Meıramqyzy.
Sporttyq-buqaralyq is-sharalardy ótkizý dırektsııasy basshysynyń orynbasary Erjigit Áserbaıdyń aıtýynsha, jarysqa qatysqan barlyq qatysýshylarǵa estelik medaldar tabystalyp, túrli baǵaly syılyqtar oınatyldy.
Aıta keteıik, «Esil RUN» jobasy Astana qalasy ákimdiginiń qoldaýymen, qalalyq sport basqarmasy men Esil aýdany ákimdiginiń uıymdastyrýymen ótti. Іs-shara barysynda qaýipsizdik sharalary tolyq saqtalyp, jedel medıtsınalyq járdem qyzmeti men tártip saqshylary kezekshilik atqardy.
Astanada qysqy maýsymda ótken marafonǵa 700-den asa adam qatysqan edi. Olar Trıatlon saıabaǵynda 5 shaqyrym qashyqtyqty baǵyndyrǵan bolatyn.