Astanada jazǵy demalyspen 242 myńnan astam bala qamtylady
ASTANA. KAZINFORM – Bıyl jazǵy demalys kezinde Astanada 1-10 synyp aralyǵyndaǵy 242 myńnan astam oqýshyny túrli demalys jáne saýyqtyrý baǵdarlamalarymen qamtý josparlanyp otyr.
Bul týraly Astana qalasy Bilim basqarmasy basshysynyń orynbasary Marjan Qaıyrbaeva qalalyq Kommýnıkatsııalar qyzmetinde ótken brıfıngte málimdedi.
Onyń aıtýynsha, jaz aılarynda qala mektepteriniń janynan lagerler men beıindik alańdar ashylady.
– Mektep janyndaǵy lagerler jumysyna 75 myńnan astam bastaýysh synyp oqýshysy qatysady. Al 5-10 synyp oqýshylaryna arnalǵan «Oqıtyn ult: OZYQ ULT», «Bolashaq LAB», «GREEN CITY: Balalar tańdaýy», «Ádilet CAMP», «Smart Bala» jáne «SAıAHAT & SPORT» baǵytyndaǵy arnaıy baǵdarlamalar ázirlendi, – dedi ol.
Sonymen qatar elordadaǵy 32 mekteptiń bazasynda ulttyq dástúr men mádenı qundylyqtardy dáripteýge arnalǵan «Atameken» etnolagerleri jumys isteıdi.
Marjan Qaıyrbaeva jekemenshik mektepter janynda 35 myńnan astam balany jazǵy demalyspen qamtý josparlanǵanyn aıtty. Budan bólek, jergilikti bıýdjet esebinen 2 681 bala qala syrtyndaǵy saýyqtyrý lagerlerine jiberiledi.
– Jazǵy demalys kezinde balalardyń qaýipsizdigine, mazmundy tynyǵýyna jáne saýyqtyrý sharalaryn uıymdastyrýǵa erekshe kóńil bólinedi, – dedi ol.
Buǵan deıin balalar lagerlerine arnalǵan biryńǵaı talaptar engizilgeni habarlaǵan edi.
