Astanada jaıylym máselesin retke keltirý talqyǵa salynady
ASTANA. QazAqparat - Jaıylymdyq jerlerdi zańmen retteý qajet. 26 qarasha kúni Májiliste «Qazaqstan Respýblıkasyndaǵy jaıylymdyq alqaptardy tıimdi basqarý jáne paıdalaný» degen taqyrypta dóńgelek ústel ótedi. Bul sharany Májilistegi agrarlyq máseleler komıteti uıymdastyryp otyr.
Aıta ketý kerek, Parlament depýtattarynyń bastamasymen «Jaıylymdar týraly» jańa zań jobasy ázirlengen bolatyn.
Ol zań jobasynda Úkimettiń jaıylymdardy utymdy paıdalaný salasyndaǵy ýákiletti organdy aıqyndaý, ýákiletti organnyń jáne ózin ózi basqarý organynyń jaıylymdardy utymdy paıdalaný jónindegi quzyretin aıqyndaý máseleleri kózdelgen. Sonymen birge, jaıylymdardy aýdandyq mańyzy bar qalalardyń, kenttiń, aýyldyq eldi mekenderdiń jáne shalǵaıdaǵy jaıylymnyń sheginde, sheginen tys berý jáne paıdalaný tártibi aıqyndaldy. Sondaı-aq, zań jobasynda jaıylymdardy memlekettik retteý jáne utymdy paıdalanýdy qoldaý sııaqty máseleler qamtylǵan. «Jaıylym máselesin retke keltirý - mańyzdy máselelerdiń biri. Osy oraıda, bul másele dóńgelek ústelde jan-jaqty talqylanatyn bolady»,- deıdi Májilis depýtaty, atalǵan zań jobasnyń bastamashylarynyń biri Jeksenbaı Dúısebaev. Osy basqosýǵa Parlament Májilisiniń depýtattarymen qatar, múddeli mınıstrlikterdiń, sondaı-aq basqa damemlekettik organdardyń basshylary men ókilderi qatysady.
