Astanada jaıaý júrginshini qaǵyp ketken M.Shyńǵysov sot zalynan bosatyldy
ASTANA. QazAqparat - Astana qalasy qylmystyq ister boıynsha apellıatsııalyq sot alqasy adam ólimine ákelgen jol-kólik oqıǵasynyń sebepkeri Maqsat Shyńǵysovty sot zalynan bosatý jóninde sheshim qabyldady, dep habarlaıdy «QazAqparat» agenttiginiń tilshisi sot zalynan.
«Astana qalasy qylmystyq ister boıynsha apellıatsııalyq sot alqasy 2014 jyly 17 maýsymda Saryarqa aýdandyq sotymen M.M.Shyńǵysovty 3 jyl bas bostandyǵynan aıyrý jáne 3 jylǵa júrgizýshi kýáliginen aıyrý týraly sheshimine qatysty japa shekken taraptyń apellıatsııalyq aryz-shaǵymy qaraldy», - dep habarlaıdy agenttik tilshisi.
Ol sheshim boıynsha, aıyptalýshy Qazaqstan Respýblıkasynyń Qylmystyq Kodeksi 2-bóliminiń 269 baby boıynsha, ıaǵnı kólik quralyn júrgizý kezinde jol erejelerin buzý arqyly abaısyzda adam ólimine soqtyrý jáne 297 baby, jol-kólik oqıǵasy bolǵan jerdi tastap qashý boıynsha aıypty dep tanylǵan bolatyn. Sot moraldyq jáne materıaldyq shyǵyndy óteýdi ishinara qanaǵattandyrdy.
Apellıatsııalyq talap-aryzda japa shekken taraptar, B.Kúzembekova men A.Esmaǵambetov sot sheshimin ózgertý jáne moraldyq, materıaldyq shyǵyndy tolyq óndirip alý jóninde suraǵan.
QR Qylmystyq Kodeksiniń 67 babyna sáıkes, eki tarap shyǵyndy tolyq óteýge qatysty máselede ýaǵdalastyqqa kelip, ortaq bitim jasasty. Іsti bolǵan aıyptalýshy zardap shekken tarapqa suralǵan aqshalaı ótemaqyny tolyǵymen ótedi.
Osydan keıin zardap shekken tarap sotqa Saryarqa aýdandyq soty shyǵarǵan úkimdi ózgertý jóninde ótinish berdi.
QR QK 67 babyna sáıkes apellıatsııalyq sot alqasy taraptardyń ýaǵdalastyqqa kelýine baılanysty aıyptalýshyny sot zalynda bosatý jóninde sheshim shyǵardy.
«QazAqparat» tilshisine bergen suhbatynda marqumnyń týǵan-týystary bul sheshimmen tolyq kelisetindikterin aıtty.
«Eshqandaı talap, narazylyǵymyz joq. Basynda moınyna almap edi, keıin barlyǵyn moıyndady, bizge kelip keshirim surady, eki jaq bir kelisimge keldi. Bizdiń oǵan eshqandaı ókpemiz joq. Jaraıdy endi, jas bala. Ol árıne kináli, biraq ne isteımiz endi. Bolǵan nárse boldy», - dedi marqum J.Aqpanovtyń ápkesi Baqyt Kúzembekova «QazAqparat» tilshisine bergen suhbatynda.
Onyń aǵasy Aıtjan Esmaǵambetov te sondaı pikirde.
«Iá, biz tatýlasýǵa sheshim shyǵardyq. Bizde eshqandaı naz joq oǵan qatysty. Onyń ómiri áli alda. Ol kináli, biraq, bolar is boldy», - dep atap ótti ol.
Eske sala keteıik, jazataıym oqıǵa bıyl 3 qańtarda Astanadaǵy Jeńis dańǵylynyń boıynda oryn aldy. Maqsat Shyńǵysov óz kóligimen egde jastaǵy er kisini qaǵyp ketken edi. Qaza bolǵan marqum Qazaqstannyń qurmetti temirjol qyzmetkeri Jaqsylyq Aqpanov ekeni keıin anyqtaldy.
