Astanada «Jaýjúrek polki» marshyna qatysýshylar 2,5 shaqyrym júrip ótedi

ASTANA. QazAqparat - 2017 jylǵy 9 mamyrda Astana qalasynyń Іshki saıasat basqarmasynyń qoldaýymen elordamyzda aıtýly sherý - Ekinshi dúnıejúzilik soǵys ardagerleri urpaqtarynyń qatysýymen «Jaýjúrek polki Astana - álemdik marsh» atty sherý ótedi.

Shara Halyqaralyq Jeńis kúnine arnaıy uıymdastyrylady, dep habarlaıdy QazAqparat.

«Jaýjúrek polki» («Bessmertnyı polk») jalpyhalyqtyq azamattyq bastamasy 2012 jyly paıda boldy. Qozǵalystyń negizgi maqsaty - Ekinshi dúnıejúzilik soǵysqa qatysqan ardagerlerdiń erligin esten shyǵarmaý. Al Astana qalasyndaǵy «Jaýjúrek polki» Keńesi 2014 jyly quryldy, onyń quramy eriktilerden, ardagerlerge qurmet kórsete biletin elimizdiń belsendi azamattarynan turady. 

Astana qalasynda Jeńistiń 70 jyldyǵyna arnalǵan sherýge 2015 jyly 1500 adam qatysqan bolatyn, olar ardagerlerdiń portretterin qoldaryna ustap Jeńis dańǵylymen júrip ótse, 2016 jyly elordadaǵy «Jaýjúrek polkine» 7 myńnan astam adam qatysty.  

Qazirgi ýaqytta «Jaýjúrek polki» - bul álemniń 60 memleketin biriktiretin halyqaralyq sherý. Polktiń jumysy Jarǵymen retteledi. Jarǵyda aıtylǵandaı: «Jaýjúrek polki» - kommertsııalyq emes, saıası emes, memlekettik emes azamattyq bastama. Polk quramyna dinine, ultyna, saıası kózqarasyna qaramastan kez kelgen azamat kire alady.

«Jaýjúrek polki Astana - álemdik marsh» sherýine qatysýshylardy jınaý 2017 jyly 9 mamyr kúni saǵat 12.30 bastalady. Sherý «Qazaq eli» monýmentinen bastalyp, «Otan qorǵaýshylar» memorıalynda (Táýelsizdik dańǵylynyń boıynda) aıaqtalady. Osylaısha, bıyl sherý 2,5 shaqyrymǵa uzartyldy.

Aıta keteıik, «Jaýjúrek polki Astana» marshyna qatysý úshin aldyn-ala tirkeýden ótýdiń ne oǵan bıletter satyp alýdyń qajeti joq. Marsh alańyn jarnama retinde paıdalanýǵa jáne transparanttarda kez kelgen saıası, korporatıvtik ne basqa da sımvoldardy jarııalaýǵa tyıym salynady.