Astanada jaýynger arýlarǵa arnalǵan fotokórme ashyldy
«Kórmeniń negizgi maqsaty - qaıtalanbas erligimen, soǵys kezindegi qaıtpas qaısarlyǵymen tarıhta qalǵan názik jandarǵa qurmet kórsetý, ósip kele jatqan jas urpaqtyń boıynda patrıottyq sezim uıalatyp, Otanǵa degen maqtanyshyn qalyptastyrý. Barlyq kezeńderde batyl da erjúrek áıelder erlermen birge ıyq tirese júrip, Uly dalany qorǵap qalýǵa atsalysty. Osylaısha Qazaqstan tarıhynda ózderiniń óshpes izin qaldyrdy. Erjúrek áıelder men qyzdarymyz: Tomırıs, Zarına, Bopaı hansha, Aıbıke arý, Gaýhar batyr, Nazym, Aqbıkesh, Sapýra batyr «Kóktemir», Mánshúk Mámetova, Álııa Moldaǵulova, Hıýaz Dospanova, Akıma Aqjolova, Lázzat Asanova, Sábıra Muhamedjanova jáne taǵy basqalar», - deıdi Qorǵanys mınıstrligi ókilderi.
Qala turǵyndary men qonaqtary atalǵan kórmeni bir aı boıy kún saıyn saǵat 09:00-den 18:00-ge deıingi aralyqta Astana qalasy, Respýblıka dańǵyly mekenjaıynda ornalasqan Ulttyq áskerı-patrıottyq ortalyqtyń Áskerı-tarıhı murajaıynda tamashalaı alady. Kirý tegin.
