Astanada jaýapsyz qurylys salýshylardy tez anyqtaýǵa bolady
ASTANA. QazAqparat - Astanada jer telimderin berýdiń jańa tásilderi jaýapsyz qurylys salýshylardy qurylystyń bastapqy kezeńinde-aq anyqtaýǵa múmkindik beredi. Bul týraly Astana qalasy ákimi apparatynyń baspasóz qyzmetine Sáýlet jáne qala qurylysy basqarmasynan habarlady.
Jer telimderin berý - Astanada ǵana emes, respýblıka boıynsha eń ózekti máselelerdiń biri. Astanada jer telimin ıgerýge kelisim berý protsedýrasy 2 kezeńnen turady.
Bastapqyda jer teliminde tekserý, izdestirý jumystaryna jáne jobalaýǵa ruqsat alý qajet.
«Jer telimderinde jobalaýǵa ruqsat etý týraly» Astana qalasy ákimdiginiń qaýlysy shyqqannan keıin barlyq sanattaǵy qurylys salýshylar (jeke jáne zańdy tulǵalar) tekserý, izdestirý jumystary jáne jobalaý júrgizý týraly
Sáýlet jáne qala qurylysy basqarmasymen kelisimshart jasasý kerek. Bul qujatta jumystardy júrgizý ýaqyty naqty kórsetiledi jáne bul merzim salýshy tarapynan da, Sáýlet jáne qala qurylysy basqarmasy tarapynan da mindetti túrde buzylmaýy kerek.
Sonymen qatar, ruqsat qaǵazdaryn alý tártibindegi ákimshilik kedergilerdi azaıtý jáne alý ýaqytyn qysqartý boıynsha tıisti jumystar atqarylýda. Mysaly, jer teliminde tekserý, izdestirý jumystaryna jáne jobalaýǵa ruqsat berý merzimi 15 kúnge deıin qysqardy.
Nazar aýdararlyq jańashyldyqtardyń biri - qurylys salýǵa úmitker tekserý, izdestirý jumystary jáne jobalaýǵa ruqsat alý sharalary kezeńinde úshinshi tulǵalardyń (úleskerlerdiń) qarjysyn tartýǵa quqyǵy joq. Atap ótý kerek, jobalaý kezeńinde jer telimi salýshynyń menshigine berilmeıdi, tek joǵaryda atalǵan jumystardy júrgizý úshin ǵana usynylady. Osyndaı sharalar jaýapsyz qurylys salýshylardy qurylystyń bastapqy kezeńinde-aq anyqtaýǵa múmkindik beredi.
Kelesi kezeń - sáýlet ǵımaratyn salý úshin jer telimin berý. Qurylys júrgizýge jer telimin berý máselesi de 15 kúnde qaralady. Jer telimderi tegin beriledi, al ýchaske úshin jalǵa berý aqysy tek ekinshi kezeńde ǵana tólenedi. Qujattardy rásimdeý eki kezeńde de memleket esebinen júrgiziledi.
