Astanada jataqhanadaǵy órtten adamdar qutqaryldy

ASTANA. QazAqparat – Astanada jekemenshik jataqhana órtenip, 60 adam evakýatsııalandy, dep habarlaıdy QazAqparat Tótenshe jaǵdaılar mınıstrligine silteme jasap.

«23 shilde kúni saǵat 21.57-de Astana qalasy Tótenshe jaǵdaılar departamentiniń Órt sóndirý bólimsheleri Kóktal aýdanynda jataqhana janyp jatqany týraly habarlamaǵa joǵary shaqyrý nómiri boıynsha shyqty.

Oqıǵa ornyna jetken kezde anyqtalǵandaı, ot 2-qabattaǵy bólmede 20 sharshy metr aýmaqta shyqqan. Jalyn tez taraldy, joǵarydaǵy bólmelerdi tútin basty. Órt sóndirýshiler qoıý tútin arasynda jumys istedi.

Elordalyq órt sóndirýshilerdiń kúshimen ıindi úsh kótergish arqyly 2 adam aman-esen qutqaryldy, 60 turǵyn evakýatsııalandy. Turǵyndardy ornalastyrý máselesin jataqhana ıesi sheshedi», - delingen málimette.

TJD kúshterimen tilsiz jaý saǵat 22.28-de oqshaýlandyrylyp, 22.48-de sóndirildi.

«Qaza bolǵandar men zardap shekkender joq», - dep naqtylady vedomstvodan.