Astanada jataqhanada bolǵan órt kezinde 47 adam qaýipsiz aýmaqqa kóshirilip, 7 adam qutqaryldy
ASTANA. 7 sáýir. QazAqparat - 6 sáýir kúni saǵat 17.24-te Astana qalasy, Saryarqa aýdanynyń Taıburyl kóshesindegi 5 qabatty jataqhanada órt boldy.
Bul týraly QR TJM-niń baspasóz qyzmetinen habarlandy.
Jataqhananyń tórtinshi qabatyndaǵy páterlerdiń birinen shyqqan órt saǵat 19.18-de sóndirildi. Tilsiz jaýdy aýyzdyqtaýǵa QR TJM Astana qalasy boıynsha TJD órtke qarsy qyzmetiniń 33 adamy men 7 tehnıkasy, QR TJM «TsMK» MM-niń 3 adamy men 1 tehnıkasy jumyldyryldy.
Jalyn sharpyǵan aýmaq 16 sharshy metrdi qurady. 47 adam, onyń ishinde 17 bala qaýipsiz aýmaqqa kóshirildi. 7 adam, sonyń ishinde 3 bala qutqaryldy. Oqıǵa ornynan kúıik shalý belgisimen 50 jastaǵy áıel aýrýhanaǵa jetkizildi.
