Astanada «Jasyl aımaq» ekologııalyq aktsııasy ótedi
ASTANA. QazAqparat - 3 maýsym kúni saǵat 9:00-den 11:00-ge deıin elordanyń jasyl beldeýinde Búkilálemdik qorshaǵan ortany qorǵaý kúnine arnalǵan aktsııa ótedi, dep habarlaıdy Astana ákimdiginiń baspasóz qyzmeti.
Aktsııanyń maqsaty - Astana qalasynyń jasyl beldeýin turmystyq jáne óndiristik qaldyqtardan tazalaý, jastardyń ekologııalyq sana-sezimin oıatý, tabıǵatty qorǵaýǵa shaqyrý.
«Týǵan qalańnyń, onyń kósheleri men gúlzarlarynyń uqypty, taza bolýy bizdiń árqaısymyzǵa baılanysty ári árdaıym qamqorlyq tanytýymyz qajet. Muny eshqashan umytpaýymyz kerek, - deıdi aktsııany uıymdastyrýshylar.
«Búkilálemdik qorshaǵan ortany qorǵaý kúni» - BUU baǵdarlamasynyń qamqorlyǵymen ótkiziletin halyqaralyq tabıǵatty qorǵaý sharasy.
Jyl saıyn 5 maýsym kúni álemdik qaýymdastyq qorshaǵan ortany qorǵaý máselesin talqylaıdy. Osy kúni búkil álemde «Jerdegi ómir úshin» urany boıynsha ekologııalyq sharalar ótkiziledi.
Mereke qarsańynda Astanada birqatar sharalar uıymdastyryldy. «Biz taza qalany tańdaımyz» degen uranmen qalany abattandyrý, jasyldandyrý jáne sanıtarlyq tazalaý kóktemgi ekologııalyq aılyq aıaqtaldy jáne apta saıynǵy «Taza juma» aktsııasy jalǵasýda.
«Jasyl aımaq» aktsııasynyń uıymdastyrýshylary - Astana qalasynyń tabıǵı resýrstar jáne tabıǵat paıdalanýdy retteý basqarmasy.
