Astanada jasulandyqtardyń Jańa jyldyq shyrshasy ótti
Bul týraly QR Qorǵanys mınıstrliginiń baspasóz qyzmeti habarlady.
Elbasy osydan 13 jyl buryn, ıaǵnı 1999 jyldyń qarasha aıynda bolashaq Otan qorǵaýshylaryn tárbıeleıtin «Jas ulan» mektebin ashqan bolatyn. Al Qazaqstan Respýblıkasy Táýelsizdiginiń 20 jyldyǵy qarsańynda general S.Q. Nurmaǵambetov atyndaǵy «Jas ulan» respýblıkalyq mektebiniń jańa keshenin saltanatty jaǵdaıda ashyp paıdalanýǵa berdi. Búginde, ulandar jańa ǵımarattyń qabyrǵasynda ulaǵatty ustazdardan dáris alyp, bilim nárimen sýsyndaýda.
Jyl saıyn Jańa jyl qarsańynda «Jas ulan» respýblıkalyq mektebinde tárbıelenýshilerdi merekelik qabyldaý rásimi ótkiziledi. Bıyl da bul dástúr jańa mekteptiń qabyrǵasynda óz jalǵasyn tapty.
Saltanatty sharany Qazaqstan Respýblıkasynyń Qorǵanys mınıstri Ádilbek Jaqsybekov ashty. Ol ustazdar men jasulandyqtardy kele jatqan Jańa jyl merekesimen quttyqtap, jańa jylda jaqsy bilim alyp, oqýda ozat, tártipti tárbıeli bolýlaryn tiledi.
- El Prezıdenti - Qazaqstan Respýblıkasy Qarýly Kúshteriniń Joǵarǵy Bas qolbasshysy Nursultan Nazarbaevtyń qamqorlyǵynyń arqasynda áskerı ınstıtýttar men mektepterde joǵary dárejeli oqytýshylar bilim berýde, onda oqý-materıaldyq bazasy men zamanaýı standarttarǵa saı jaǵdaılar jasalǵan. Sizder baqyttysyzdar. Elbasy, sizderdiń erteńgi kúni Otan qorǵany bolatyndaryńyzǵa senedi. Biraz jyldar ótken soń sizder qazirgi jasóspirimder - memleketimizge qyzmet etetin bolasyzdar,-dep atap ótti Qorǵanys vedomstvosynyń basshysy.
Saltanatty jaǵdaıda Aıaz Ata jáne Aqshaqarmen birge mektep oqýshylary Jańa jyldyq shyrshanyń otyn jaqty. Jasulandyqtarǵa mınıstrdiń atynan syılyqtar tapsyryldy.