Astanada jastarǵa jumysshy mamandyqtaryn tanystyrý is-sharasy ótti
ASTANA.KAZINFORM — Búgin Astana qalasynyń Indýstrııalyq park aýmaǵynda «Jasyl el» eńbek jasaǵynyń jastaryna arnalǵan arnaıy tanystyrý ekskýrsııasy ótti. Іs -shara «Jumysshy mamandyqtarynyń jyly» jáne «Taza Qazaqstan» jalpyulttyq ekologııalyq aktsııasy aıasynda uıymdastyryldy.
Ekskýrsııa Astana qalasy Jastar saıasaty máseleleri basqarmasynyń bastamasymen, qala ákimdigi janyndaǵy «Astana Invest» ınvestıtsııalardy damytý ortalyǵynyń qoldaýymen ótti. Іs-sharanyń maqsaty — jastar arasynda jumysshy mamandyqtarynyń bedelin arttyrý, óndiristik baǵyttaǵy kásipterge degen qyzyǵýshylyqty oıatý jáne kásibı baǵdar berý.
Sharaǵa 100-den astam jas qatysyp, qurylys materıaldaryn óndiretin kásiporyndar, metall konstrýktsııalaryn shyǵaratyn óndiris oryndary jáne joǵary tehnologııaly avtomattandyrylǵan óndiris jelilerimen jabdyqtalǵan zaýyttardyń jumysymen tanysty.
Jastarǵa arnalǵan kásibı baǵyt-baǵdar berý sessııalarynda tájirıbeli ınjenerler men zaýyt jetekshileri óz tájirıbelerimen bólisip, jastardyń suraqtaryna jaýap berdi. Sonymen qatar ekskýrsııaǵa qatysýshylarǵa ındýstrııalyq park aýmaǵynda júzege asyrylyp jatqan ınvestıtsııalyq jobalar men bolashaqtaǵy jumys oryndary týraly keńinen aqparat berildi.
Astana qalasy ákimdiginiń Jastar saıasaty máseleleri basqarmasynyń basshysy Samat Sabyruly Ibraev bul bastamanyń mańyzdylyǵyna toqtaldy.
— Biz jastarymyzdyń jazǵy ýaqytta paıdaly eńbekpen aınalysyp, elimizdiń ındýstrııalyq áleýetimen tanysqandaryn qalaımyz. Jumysshy mamandyqtary búginde asa qajet jáne bedeldi salaǵa aınalyp keledi. Bul — tek eńbek naryǵyna beıimdelý ǵana emes, sonymen qatar jastardyń boıynda ekologııalyq, áleýmettik jáne kásibı jaýapkershilikti qalyptastyrýdyń bir joly. «Jasyl el» jobasy arqyly biz bul baǵytta júıeli jumys júrgizip kelemiz, — dedi basqarma basshysy.
Onyń aıtýynsha, búgingi tańda «Jasyl el» jastary ekologııalyq jáne qoǵamdyq mańyzy bar isterge belsene atsalysyp júr. Atap aıtqanda, búgingi shara aıasynda Indýstrııalyq park aýmaǵynda ekologııalyq senbilik te uıymdastyryldy. Bul jumystar «Taza Qazaqstan» aktsııasy men «Jumysshy mamandyqtarynyń jyly» sheńberinde iske asyryldy.
— Atalǵan sharalardyń basty maqsaty — jastar arasynda ekologııalyq mádenıetti qalyptastyrý jáne olardy eńbekke baýlý. Sonymen qatar jastar men jalpy qoǵamǵa tabıǵatty aıalaý, qorshaǵan ortaǵa janashyrlyqpen qaraý mádenıetin sińirý. Al «Jumysshy mamandyqtarynyń jyly» aıasynda zaýyt, óndiris, kommýnaldyq sala qyzmetkerleriniń eńbegimen tanysý — jastar úshin úlken tárbıelik mánge ıe. Bul — jaýapty ári mańyzdy jumys. Sondyqtan jastardy eńbekke baýlý, olarǵa ıdeologııalyq qoldaý kórsetý — bizdiń ortaq mindetimiz, — dedi Samat Ibraev.
«Jasyl el» jobasy sheńberinde Astana qalasynda jaz mezgilinde 5000-ǵa jýyq jas jumysqa tartylmaq. Maýsym aıynyń basynan bastap elordada 1000-nan astam jas túrli baǵyttaǵy abattandyrý, kógaldandyrý jáne tazalyq jumystaryna jumyldyrylǵan. Olar qaladaǵy saıabaqtar, skverler, mektep aýmaqtary men Esil ózeniniń jaǵalaýyn tazartý jumystarymen aınalysyp jatyr.
— Búgingi jastar — erteńgi óndiris sheberleri men ınjenerleri. Biz olardyń óz eliniń damýyna naqty úles qosýyn qalaımyz. «Taza Qazaqstan» aktsııasy osy maqsatqa jetýdiń bir joly. Bul — tek bir rettik shara emes, júıeli ári uzaqmerzimdi jumys, — dedi ol.
Aıta keteıik, bul ekskýrsııa — «Jasyl el» jobasynyń 2025 jylǵy maýsymdyq jumys kezeńiniń bir bóligi.
Buǵan deıin, «Jasyl el» baǵdarlamasy boıynsha 14 jastan asqan astanalyqtar jumys isteı alatynyn jazǵanbyz.