Astanada jastarǵa qandaı jumys usynylady
ASTANA. KAZINFORM — Astanada 13,6 myń jas jumyssyz. Jyl basynan beri 27 myńnan astam jas jumysqa ornalasýǵa kómek surap Mansap ortalyqtaryna júgingen. Elordada jas mamandarǵa qandaı jumys usynylady jáne qaı mamandyqtarǵa suranys bar?
Bul týraly Astana qalasy ákimdiginiń «Eńbek mobıldiligi ortalyǵy» KMM dırektory Omar Oljas málim etti.
Onyń aıtýynsha, jyl basynan beri Mansap ortalyqtaryna 27 564 jas júgingen. Onyń 8 183-i jumyspen qamtý sharalaryna qatysyp, 3 547-si turaqty jumysqa ornalasqan.
— Túlekter men jas mamandardy qoldaýdyń negizgi tetikteriniń biri — «Jastar praktıkasy». Búginde baǵdarlama aıasynda 209 uıym 529 bos jumys ornyn usynyp otyr. Zańger, býhgalter, júıelik ákimshi, qarjyger, qarjylyq taldaýshy, ekonomıst jáne jýrnalıst mamandaryna suranys bar, — dedi ol.
«Jastar praktıkasy» boıynsha qaıda jumysqa ornalasýǵa bolady?
Baǵdarlamaǵa memlekettik mekemelermen qatar ulttyq kompanııalar men kásiporyndar da qatysady. Olardyń arasynda «Qazaqstan» respýblıkalyq teleradıo korporatsııasy, Astana Innovations, «Astana-Energııa», Kazakh Invest jáne Qazaqstannyń elektr energııasy men qýaty naryǵynyń operatory bar.
Jas mamandarǵa Qarjylyq monıtorıng agenttigi, Syrtqy ister, Energetıka, Ǵylym jáne joǵary bilim, Kólik mınıstrlikteri de jumys oryndaryn usynady.
«Jastar praktıkasy» boıynsha jumys oryndaryn uıymdastyrýǵa jumys berýshilerden ótinim qazan aıynyń sońyna deıin qabyldanady.
Astanada qansha jas jumyssyz?
Ulttyq statıstıka bıýrosynyń dereginshe, Astanada 516 022 jas turady. Onyń shamamen 164 myńy bilim alyp júr: 126 myńy joǵary oqý oryndarynda, 38 myńǵa jýyǵy kolledjderde oqıdy.
Elordada eńbek kúshiniń quramyna kiretin jastar sany 354,1 myń adamǵa jetedi. Onyń 340,6 myńy jumyspen qamtylǵan, 13,6 myńy jumyssyz.
Al resmı túrde jumyssyz retinde 8 439 jas tirkelgen. Onyń 5 552-si — áıel, 2 887-si — er adam.
Tirkelgen jumyssyzdardyń eń kóbi 30–34 jas aralyǵynda — 3 321 adam. 25–29 jastaǵylar sany — 2 544, 20–24 jastaǵylar — 2 405. Al 16–19 jas aralyǵynda 169 adam jumyssyz retinde tirkelgen.
Olardyń 5 220-synda joǵary, 3 043-inde orta kásiptik bilim bar. Taǵy 122 adam joǵary oqý ornynan keıingi bilim alǵan. 54 adamnyń bilimi joq.
Jumysty qaıdan izdeýge bolady?
Jyl basynan beri Astanada 30 bos jumys oryndary jármeńkesi ótken. Onyń altaýy joǵary oqý oryndary men kolledj túlekterine arnalǵan.
Bos jumys oryndaryn Enbek.kz portalynan da izdeýge bolady. Qazir onda Astana boıynsha 6 200 jumys berýshi usynǵan 12 897 bos jumys orny bar.
— Jastardy jumyspen qamtýda jumys izdeýdiń qoljetimdi joldaryn usynýǵa, jas mamandar men jumys berýshilerdiń tikeleı baılanysyna jáne jastardyń alǵashqy kásibı tájirıbe jınaýyna basymdyq berilip otyr, — dedi Omar Oljas.
Aıta keteıik, buǵan deıin jumys berýshi eńbek sharty jasalǵannan keıin onyń talaptaryn qyzmetkerdiń kelisiminsiz ózgerte almaıtyny, eńbek shartyna engiziletin ózgerister taraptardyń kelisimimen rásimdeletini jóninde jazdyq.
