Astanada «Jastar» teatry janyp jatyr
ASTANA. QazAqparat - Astanada «Jastar» teatrynan órt shyqty, dep habarlaıdy QazAqparat QR ІІM Tótenshe jaǵdaılar komıtetiniń resmı ókili Rýslan Imanqulovqa silteme jasap.
Saryarqa aýdanynda ornalasqan teatrda órt búgin saǵat 16.58-de bastalǵan.
«Esenberlın, 10 kóshesindegi úshqabatty «Jastar» teatrynyń shatyry janyp jatyr. Jalyn sharpyǵan aýmaq aldyn ala boljam boıynsha 50 sharshy metrdi quraıdy», - dedi resmı ókil.
Atap ótilgendeı, adamdardyń evakýatsııasy júrgizilmegen. Qurbandar men zardap shekkender joq.
Tilsiz jaýmen kúres jalǵasýda. Oqıǵa ornynda 16 tehnıka men 60 órt sóndirýshi jumys isteýde.
«Órtti aýyzdyqtaý jáne jalynnyń odan ári taralmaýy úshin shuǵyl sharalar qolǵa alynýda», - dep atap ótti R.Imanqulov.
Buǵan deıin Tótenshe jaǵdaılar komıteti «Jastar» teatryn qoıý tútin basqany týraly habar túskenin málim etken bolatyn. Oqıǵa ornyna aldymen 40 adam men 10 tehnıka attandyryldy. Biraq qutqarýshylar ashyq jalyndy baıqamaǵan. Keıin mán-jáıdy anyqtaý úshin ǵımart ishin sholýǵa kirisken.
