Astanada Jastar resýrstyq ortalyqtarynyń basshylaryna arnalǵan oqytý trenıngteri bastaldy
ASTANA. KAZINFORM – Elordadaǵy «Qazmedıa ortalyǵynda» Mádenıet jáne aqparat mınıstrliginiń qoldaýymen óńirlik Jastar resýrstyq ortalyqtarynyń basshylary úshin «Kásibı damý akademııasy» jobasy aıasynda oqytý semınar-trenıngi bastaldy.
Jastar saıasaty salasyndaǵy mamandardyń biliktiligin arttyrýǵa baǵyttalǵan is-shara «Jastar» ǵylymı-zertteý ortalyǵynyń uıymdastyrýymen ótip jatyr.
Oqytý baǵdarlamasy kóshbasshylyq jáne basqarýshylyq daǵdylardy damytýǵa, zamanaýı tsıfrlyq quraldardy, onyń ishinde jasandy ıntellekt tehnologııalaryn meńgerýge, sondaı-aq daǵdarystyq kommýnıkatsııa men buqaralyq aqparat quraldarymen ózara áreket etý daǵdylaryn jetildirýge baǵyttalǵan.
Úsh kúndik semınar barysynda qatysýshylar medıa jáne jasandy ıntellekt salasyndaǵy sarapshylardan praktıkalyq bilim alyp, kópshilik aldynda sóıleý daǵdylary, áleýmettik jelilermen jumys erekshelikteri jáne mobılografııa negizderin meńgeredi.
Qazirgi ýaqytta Qazaqstanda 235 jastar resýrstyq ortalyǵy jumys isteıdi, onda jasóspirimder men jastarǵa aqparattyq-konsýltatsııalyq, quqyqtyq, psıhologııalyq jáne áleýmettik qoldaý kórsetiledi.
«Kásibı damý akademııasy» jobasy 2021 jyldan beri júzege asyrylyp jatyr. Joba jastarmen jumys isteıtin mamandardyń biliktiligin júıeli túrde jetildirýge yqpal etip, memlekettik jastar saıasatyn iske asyrý tıimdiligin arttyrýǵa mańyzdy úles qosyp keledi.
Eske sala keteıik, pedagogterge onlaın-qaýipsizdik boıynsha mindetti trenıng engiziletinin jazǵanbyz.
