Astanada jastar ortalyqtarynda psıhologtar, zańgerler jáne dárigerler tegin kómek kórsetedi

ASTANA. KAZINFORM — Astanada jastar men otbasylarǵa qoldaý kórsetetin ortalyqtardyń qyzmetine monıtorıng júrgizildi. Bul shara QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa bastamasymen uıymdastyryldy.

Monıtorıng tobyna Májilis depýtaty Snejana Imasheva, Ulttyq komıssııa men qalalyq komıssııanyń ókilderi kirdi. Delegatsııa músheleri №10 qalalyq emhanadaǵy «Ózińdi tap» ortalyǵy men №5 emhanadaǵy «Shýaq» jastar densaýlyq ortalyǵynyń jumysymen tanysty.

Ortalyqtarda jastarǵa psıhologııalyq, medıtsınalyq jáne quqyqtyq keńes tegin beriledi. Mamandardyń aıtýynsha, jasóspirimder kóbine ata-anamen qarym-qatynas, ózin-ózi baǵalamaý, kúızelis jáne UBT-ǵa baılanysty qysym máselelerimen júginedi. Sondaı-aq gınekolog pen ýrolog qyzmetteri de qoljetimdi.

Qazirgi tańda elordada 11 jastar densaýlyq ortalyǵy jáne 1 otbasyn qoldaý ortalyǵy jumys isteıdi. «Shýaq» ortalyǵy 10–29 jas aralyǵyndaǵy 6650-den astam jasqa qyzmet kórsetedi. Munda áleýmettik qyzmetker, zańger, psıholog, dárigerler turaqty túrde qabyldaıdy.

Májilis depýtaty Snejana Imashevanyń aıtýynsha, elimizde 100-den astam osyndaı ortalyq bar. Alaıda olardyń kóbi qalada shoǵyrlanǵan, al aýyl jastary úshin qoljetimdiligi tómen. Sonymen qatar, ortalyqtar jumysy jaıly kóp ata-analar habarsyz.

«Januıa» otbasyn qoldaý ortalyǵy FSM Social tsıfrlyq júıesi negizinde qıyn jaǵdaıdaǵy otbasylardy anyqtap, keshendi kómek kórsetip keledi. Jarty jyl ishinde 1500-den astam ótinish túsip, 79 otbasy tatýlastyrylǵan. 49 otbasy áleýmettik súıemeldeýge alynǵan.

Ortalyqta otbasylyq qundylyqtardy nyǵaıtý maqsatynda trenıngter, dárister jáne tikeleı efırler ótkiziledi. Bul jumystarǵa psıhologtar, medıatorlar, zańgerler men ata-analar keńesiniń ókilderi tartylǵan.

Aıta keteıik, jastardyń eńbek naryǵyna kelýi jylyna 360 myń adamǵa deıin ósedi.