Astanada jastar men jasóspirimder arasynda temeki shegýge qarsy kúres talqylandy
Astana qalasy Salaýatty ómir saltyn qalyptastyrý ortalyǵynyń dırektory Aqmaral Qurmanbaeva temeki shegýdiń barsha álemde adamdardyń óliminiń basty sebepteriniń biri bolyp tabylatynyn atap ótti. Sondyqtan bul másele asa ózekti, ásirese balalar men jasóspirimderdiń temeki shegýi máselesi qatty alańdatady, - dedi ol.
Medıtsınalyq-áleýmettik ońaltý ortalyǵy bas dárigeriniń orynbasary Gaýhar Bektaevanyń aıtýynsha, jyl saıyn temeki shegetin adamdar sany ulǵaıady, olar negizinen dárigerdiń kómegine júginbeıdi.
- 2015 jyly Astana boıynsha nıkotınge úıir bolǵan kámeletke tolmaǵan 70 bala tirkeldi, sonyń ishinde 11 jýyǵy 14 jasqa deıingi balalar. Bul asa kúrdeli másele. Qazirgi kezde jastar arasynda temeki tartý sánge aınaldy. Ásirese, jasóspirim qyzdardyń arasynda. Árıne, nıkotın - bul zańdy psıhoaktıvti zat, ony kez kelgen dúkennen satyp alýǵa bolady. Qoǵamdyq jerlerde temeki shegýge tyıym salynyp, naqty sharalar qabyldanýda, mysaly, kámeletke tolmaǵan balalarǵa temeki satqany úshin ákimshilik aıyppuldar salynady, al shyndyǵynda bári basqasha, adamdardyń barlyǵy temeki shegedi, quramyna tabak pen basqa da zattar kiretin nasybaı atady, osynyń barlyǵy jas aǵzanyń damýyna áser etedi. Bul temekige táýeldilikke aparady, sondyqtan onymen kúresý kerek, - dedi Gaýhar Bektaeva.
Óz kezeginde Astana qalasy Іshki ister departamenti esirtki bıznesine qarsy kúres bóliminiń basshysy polıtsııa podpolkovnıgi Sergeı Ilınyh elektrondy kalıan shegetin jastardyń kóbeıgenin, oǵan da sıntetıkalyq zattardyń qosylatynyn, adamdar táýeldilikke salynatynyn jetkizdi.
- Biz temeki qospalaryn tekserý boıynsha jumystardy qolǵa alyp, reıdter ótkizemiz. Qazirgi kezde tamaq ishetin oryndar aýmaǵynda temeki shegýge tyıym salatyn zań da qoldaý tapty. Osyǵan oraı, saýda oryndarynda jáne jastar demalatyn oryndarda da reıdter júrgiziledi. Nasybaı da tárkilenedi, - dedi Sergeı Ilınyh.
Sonymen qatar, temeki shegýge qarsy kúres boıynsha basqa da sharalar qabyldanýda. Astana qalasynyń Densaýlyq saqtaý basqarmasy túrli saýyqtyrý aktsııalaryn, úzdik sporttyq otbasy konkýrsyn, júgirýler, qalalyq parkter men saıabaqtarda gımnastıka jattyǵýlaryn jasaýdy jáne t.b. uıymdastyrady. Atalǵan sharalar túrli jastaǵy adamdarǵa arnalǵan, óıtkeni temeki shegetin balalar sanyn azaıtý úshin birinshi kezekte, eresektekterdiń ózderi bul zııandy ádetten arylýy kerek.
Jyl saıyn elimizde 1-31 mamyr aralyǵynda Dúnıejúzilik temeki shegýge qarsy kúres kúnine oraı aılyq ótkiziledi. Quqyq qorǵaý organdary, bilim, densaýlyq saqtaý jáne basqa da múddeli vedomstvolar birlesip, qoǵam nazaryn balalar men jasóspirimderdiń temeki shegýi máselesine aýdarmaq, sondaı-aq, jas urpaqtyń densaýlyǵyna qater tóndiretin temeki shegýge qarsy kúres boıynsha keń aýqymdy jumystar júrgizedi.