Astanada jastar men fermerlerdi biriktirgen Alma festıvali ótti
ASTANA. KAZINFORM — Elordada Birikken Ulttar Uıymynyń Azyq-túlik jáne aýyl sharýashylyǵy uıymynyń (FAO) 80 jyldyǵy men Dúnıejúzilik azyq-túlik kúnine arnalǵan Alma festıvali ótti.
Atalǵan is-shara Aýyl sharýashylyǵy mınıstrligi, FAO jáne Nıderland Koroldigi elshiliginiń qoldaýymen uıymdastyrylyp, festıvalge dıplomatııalyq korpýs ókilderi, fermerler men jastar qatysty.
Aýyl sharýashylyǵy vıtse-mınıstri Erbol Tasjúrekov festıvaldiń aýyl sharýashylyǵy salasyndaǵy dástúr men jańashyldyqty ushtastyratyn mańyzdy alań ekenin atap ótti.
— Alma festıvali — bul tek egin merekesi ǵana emes, aýyl sharýashylyǵynyń baı dástúrleri men azyq-túlik qaýipsizdiginiń mańyzyn aıqyndaıtyn shara. Óskeleń urpaqtyń ınnovatsııa men yntymaqtastyqqa degen qyzyǵýshylyǵynyń artýy — salanyń jarqyn bolashaǵyna senimdi kúsheıtedi, — dedi ol.
FAO-nyń Qazaqstandaǵy baǵdarlamalyq úılestirýshisi Janyl Bozaeva is-sharanyń elimizde ótýiniń sımvoldyq mánin aıtty.
— Іle Alataýy men Tıan-Shannyń etekteri — almanyń otany. Bul — ortaq mádenı jáne tabıǵı muramyzdy dáripteý men agroazyq-túlik júıelerin damytýdaǵy yntymaqtastyqtyń mańyzyn aıǵaqtaıdy, — dedi ol.
Festıval aıasynda fermerler jármeńkesi, jastarǵa arnalǵan ınnovatsııalyq sessııalar men mádenı baǵdarlamalar ótti.
Buǵan deıin «Aportty» qalpyna keltirý úshin 110 gektar jer baqqa aınalatynyn jazǵanbyz.