Astanada «Jastar - Qazaqstan halqy birligi úshin» atty jalpyulttyq forým bastaldy

dep habarlaıdy QazAqparat.

Búgin forým aıasynda «Urpaqtar sabaqtastyǵy» taqyrybynda qoǵam, mádenıet qaıratkerleri jáne zııaly qaýym ókilderi eldiń ár túkpirlerinen kelgen delegattarmen kezdesý ótkizip, olarǵa birlikte turyp, eldiń bolashaǵy jolynda aıanbaýǵa, bilim men qyzmette jetistikti bolýǵa úndedi. Jıynda halyq ártisi, Májilis depýtaty Bekbolat Tileýhan, fılosof, senator Ǵarıfolla Esim syndy qoǵam qaıratkerleri týǵan tildiń, dildiń jáne ulttyq salt-sananyń, tarıhı jadtyń saqtalýy urpaqtardyń qolynda ekendigin erekshe atap kórsetti. Sonymen qatar bul dıalogtik alańda - keıingi urpaqqa ulttyq ıgilikter men adamzattyq qundylyqtar, rýhanı-mádenı muralar sabaqtastyǵynyń mańyzyn túsindirdi.

«Birlik kerek bizge. Al birlik degen nárse bul mahabbatpen keledi. Bir-birimizdi súımeı, bizge birlik joq. Qurandaǵy súrelerdiń «Asa qamqor, erekshe meıirimdi Allanyń atymen bastaımyn» dep bastalýy bekerden beker emes. Kimde qamqorlyq joq, kimde meıirim joq, kimde bir-birine degen mahabbat joq - «Birińdi qazaq biriń dos, kórmeseń istiń bári bos» dep Abaı atamyz aıtqandaı, istiń bári beker bolady. Qazaqtyń búgingi jaqsylyqqa jetip otyrǵandyǵynyń ózi basqaǵa degen mahabbatynan bolatyn. Eshkimdi jatsynǵan joqpyz. Biraq bizdiń darhandyǵymyz, keńdigimiz - úlesimizdiń, múddemizdiń ketetin dúnıesine aınalyp ketpeýi tıis. Bizdiń darhandyǵymyzǵa, keńdigimizge, mahabbatymyzǵa mahabbatpen jaýap qaıtýy qajet. Jaqsylyqqa jaqsylyq bolýy kerek. Sol jaqsylyqqa muryndyq bolatyn - qazaqtyń birligi, qamqorlyǵy, aqyly, sabyry. Qazaqty qalqalaǵan basqa baýyrlas jurttyń aradaǵy bizdiń qamqorlyǵymyzdyń barlyǵy - bizdi shynaıy baqytqa bastaıdy», deıdi depýtat B. Tileýhan.

Erteń, sharanyń negizgi bóliginde, Táýelsizdik saraıynda «Jastar - Qazaqstan halqy birligi úshin» atty plenarlyq otyrysy ótetin bolady. «Jastardyń óńirlerdegi jetistikteri kartasy» atty kórme ótedi.

Qazaqstan jastar kongresi, Qazaqstan halqy Assambleıasy uıymdastyrǵan sharanyń basty maqsaty bilikti, talantty, belsendi jastardy óz salasynyń bilikti mamanyna aınalýy úshin qosymsha aqparat pen bilim alýǵa jaǵdaı jasaý, saıasat sahnasyndaǵy belgili tulǵalarmen, mádenıet qaıratkerlermen birge ashyq dıalog ótkizý.