Astanada jastar forýmy ótip jatyr

ASTANA. QazAqparat - Elorda jastaryn bıznes baǵytynda qoldaý jáne yntalandyrý maqsatynda «Jastar jalyny» forýmy ótip jatyr, dep habarlaıdy QazAqparat tilshisi.

Elorda ákimdiginiń uıymdastyrýymen ótip jatqan aıtýly sharada bıznes qıyndyqtaryna moıymaı, úlken jetistikterge jetken tanymal tulǵalar óz tájirıbelerimen bólisip, bıznestiń qyr-syrymen tanystyrýda.

Forýmnyń negizgi maqsaty - ıkemdilik pen ashyqtyqty qalyptastyrý, jastardy keń aýqymdy ózgerister men jetistikterge jeteleý. Olardyń bir-birimen tanysyp bilim men tájirıbe almasý jáne bolashaq seriktesterimen iskerlik kelissózder júrgizýge múmkindik týǵyzý.

Sharaǵa elimizge tanymal, jastarǵa qoldaý bildirip, alǵa umtyldyratyn túrli sala ókilderi, onyń ishinde Dınara Sátjan, telejúrgizýshi, Andreı Sýdakov 2Gis Astana jobasynyń negizin qalaýshy, Serik Esmatov, paralımpıadalyq sportshy, 100 jańa esim jobasynyń jeńimpazy, Nurlan Óteshev, «Azamattyq bastamalardy qoldaý» ortalyǵynyń tóraǵasy, Arslan Dárimov «Rocket Study» jobasynyń jetekshisi, Alpamys Shárimov, TV prodıýser, PR menedjer, Dmıtrıı Korepanov «Qazaqstanda jasalǵan» saýda jáne qyzmet ortalyǵynyń dırektory jáne taǵy basqa barlyq sany 20-ǵa jýyq arnaıy qonaqtar shaqyryldy.

«Bul forým Elorda tórinde osymen 8-shi ret ótkizilip otyr, biraq osy jolǵy forýmnyń jóni bólek, ony ózderińiz de jaqsy bilesizder, Elbasy óziniń jańa Joldaýynda kelesi jyldy jastar jyly dep atap ótýdi usyndy. Aldaǵy jyly elimizdiń jastary úshin jasalatyn sharalar men atqarylatyn ister kóp jáne ol búkil elimiz boıynsha júrgiziledi. Al onyń ishinde bas qalamyz Astana men onyń jastarynyń orny bólek. Adam ómirindegi eń qymbat dúnıeniń biri ýaqyt desek, sol qymbat dúnıedi  jastyq shaqta durys paıdalana bilý mańyzdy. Sizderge aıtpaǵym, qymbat ýaqyttaryńyzdy bilim alýǵa, jańa, jaqsy dúnıeni úırenip, bilýge jumsańyzdar. Ol úshin elimizde barlyq múmkindik jasalǵan. Baqytty ómir súrgilerińiz kelse, búginnen bastańyzdar», - dedi Astana qalasy ákiminiń orynbasary Ermek Amanshaev. 

Forým barysynda jastar arnaıy shaqyrylǵan qonaqtarmen beıresmı túrde sóılesip, pikir alysyp, kókeılerinde júrgen suraqtaryn qoıyp, oǵan jaýap alý múmkindigi qarastyrylǵan.

Sharaǵa elorda ýnıversıtetteri men kollejderiniń 200-den astam stýdent jastary qatysýda.