Astanada «Jastar birligi aptalyǵy» HІІ qalalyq festıvali bastalady

Festıval aıasynda joǵary jáne arnaıy oqý oryndarynda bilim alatyn jastar arasynda barlyǵy 17 is-shara ótkiziledi, sonyń ishinde qan tapsyrý aktsııasy bar.

Búgin sharanyń bastalýyna oraı baspasóz máslıhaty ótti. Astana qalasy máslıhatynyń depýtaty Eldar Qatenov atap kórsetkendeı, 1997 jyldan beri ótkizilip kele jatqan festıval jylda 10 qarasha kúni bastalady. Dástúrge aınalǵan bul kún keıin Astana qalasy jastarynyń kúni bolyp bekitildi. Festıvaldyń qorytyndysy 17 qarasha - Stýdentterdiń búkildúnıejúzilik kúni shyǵarylady.

Bıyl jastar aptalyǵyna joǵary jáne arnaıy bilim beretin barlyǵy 20 oqý mekemesi qatysady. Jalyndy jastardyń shyǵarmashylyq, sporttyq jáne ıntellektýaldyq talaptaryn aıqyndap, qoldaý bildirýdi kózdeıtin festıval barysynda uıymdastyrylatyn is-sharalardyń baǵyty ártúrli. Sondyqtan árbir jasta óziniń qabilettin kórsetýine múmkindigi bar. Bir jetige sozylatyn dodaǵa barlyǵy 8 myńnan astam jas qatysady dep kútilýde.

Ótkiziletin sharalardyń arasynda «En Counter» esktrım-oıyny, ultjandylyqqa tárbıeleýdi maqsat etetin - «Patrıot» aktsııasy, qarttar úıi men korrektsııalyq mektepte ótetin «Qamqorlyq» aktsııasy, qazaq jáne orys tilderinde ótetin KVN oıyndary, «Eki juldyz» shoý baǵdarlamasy, «Jastar - El bolashaǵy» poezııalyq keshi jáne qan tapsyrý aktsııasy bar.

Qan tapsyrý aktsııasy barysynda qalalyq Qan ortalyǵymen jasalǵan kelisimge sáıkes, arnaıylandyrylǵan kólik úsh kún qatarynan aptalyqqa qatysýshy barlyq JOO-lar men arnaıy oqý mekemelerin aralaıdy. E.Qatenovtyń sózine qaraǵanda, buǵan deıingi aktsııada muqtaj jandarǵa kómektesýge 1 myńǵa jýyq jas nıet bildirgen.

Depýtattyń aıtýynsha, festıval uıymdastyrylyp kele jatqan 12 jyl boıy S.Seıfýllın atyndaǵy Qazaq agrotehnıkalyq ýnıversıteti «Eń úzdik JOO» sanalyp keledi. «Talantty jastar barlyq oqý ornynda bar. Biraq olardy anyqtap, qoldaý bildire otyryp shyńdaýǵa múmkindikter jasaý barlyq bilim mekemesinde jolǵa qoıylmaǵan. Agrarlyq ýnıversıtette stýdentterge tek ýnıversıtet ishindegi emes, sondaı-aq qalalyq, respýblıkalyq jáne halyqaralyq deńgeılerdegi baıqaýlarda óner kórsetýge múmkindikter jasalǵan», - dep atap ótti ol.