Astanada jastar arasynda kórkem gımnastıkadan Qazaqstan chempıonaty ótedi
ASTANA. QazAqparat - Búgin Astanada jastar arasynda kórkem gımnastıkadan el chempıonaty óz jalaýyn kóteredi, dep habarlaıdy QazAqparat tilshisi Astana qalasynyń mádenıet jáne sport basqarmasyna silteme jasap.
Basqarmanyń baspasóz qyzmetiniń habarlaýynsha, kórkem gımnastıkadan ótetin el chempıonatynda 11 oblys pen Astana, Almaty men Shymkent qalalarynyń sportshylary baq synaıdy.
Sporttyq básekede barlyǵy 106 gımnastshy jeke baǵdarlamamen, odan bólek 30 komanda (ár komandada 6 adamnan) toptyq jattyǵý boıynsha sheberlik baıqasady.
Sonymen qatar, qatysýshylar arasynda toptyq jattyǵýlar boıynsha kópsaıystan sport sheberi (2002-2003 jyldary dúnıege kelgender) jáne sport sheberine kandıdat (2004-2006 jyldary dúnıege kelgende) dárejesi úshin jeke birinshilik ótkiziledi.
Atalǵan básekede elorda namysyn toptyq jattyǵý boıynsha 5 komanda jáne jekelegen baǵdarlamada 10 sport sheberi men 11 sport sheberine kandıdat qorǵaıtyn bolady.
El chempıonaty 30 qańtar men 1 aqpan aralyǵynda Astanadaǵy Kórkem gımnastıka akademııasynda ótedi.
