Astanada jastar arasynda aýyr atletıkadan Azııa chempıonaty bastaldy
ASTANA. KAZINFORM — Elordada jasóspirimder jáne jastar arasynda aýyr atletıkadan Azııa chempıonaty ótip jatyr.
Aıtýly sporttyq is-sharanyń ashylý saltanaty «Qazaqstan» jeńil atletıkalyq sport kesheninde ótti. Azııanyń 25 elinen kelgen 300-den astam jas sportshy onyń ishinde Qazaqstan, Ózbekstan, Qytaı, Úndistan, Vetnam, Taıland, Ońtústik Koreıa jáne Kýveıt eliniń aýyr atletteri baq synap jatyr. Uıymdastyrýshylardyń aıtýynsha, eń úlken quram Qazaqstannan qatysyp jatyr, el namysyn 36 sportshy qorǵaıdy.
— Bul jáı ǵana jarys emes, dostyqtyń, qaısarlyqtyń báıgesi. Memleket basshysynyń qoldaýymen elimizde sportqa erekshe kóńil bólinip jatyr. Aýyr atletıka — myqty qalyptasqan sport túri, qazir 29 myńnan astam qazaqstandyq osy sport túrimen turaqty aınalysady. Qazaqstan — halyqaralyq sport áleminde tájirıbesi mol el, búgingi chempıonat sonyń jarqyn dáleli. Aýyr atletıkadan Azııa chempıony bolý, álem chempıony bolýmen teń, ıaǵnı Azııada top jarý, álem jeńimpazyna bir qadam jaqyndaý. Búgingi jarysqa qatysqan ár sportshy óz eliniń ǵana emes, búkil Azııanyń úmiti. Chempıonat elder arasyndaǵy dostyqtyń nyǵaıtyp, jastardy sportqa baýlıdy. Aýyr atletıkadan Azııa chempıonatyn ashyq dep jarııalaımyn, barshańyzǵa sáttilik, — dedi Týrızm jáne sport mınıstri Erbol Myrzabosynov sporttyq dodanyń ashylý saltanatynda.
4-10 shilde aralyǵynda ótetin aýyr atletıkadan Azııa chempıonatynda 17–20 jas aralyǵyndaǵy jas atletter aýyr atletıkanyń klassıkalyq jattyǵý, ıaǵnı julqı jáne serpe kóterý túrinen baq synaıdy. Jeńimpazdar jekelegen jattyǵý jáne qos saıystyń jalpy qorytyndysy boıynsha anyqtalady.
Aıta keteıik, Qazaqstan aýyr atletıkadan iri halyqaralyq jarysqa sońǵy ret 2014 jyly Almatyda ótken Álem chempıonatynda qatysqan bolatyn. Astanadaǵy Azııa chempıonaty — qazaqstandyq aýyr atletıkanyń jańa kezeńiniń bastamasy deıdi uıymdastyrýshylar.
