Astanada jasóspirimder kólikterdi búldirip ketti: ata-analary jaýapqa tartylady

ASTANA. KAZINFORM — Astanada vandalızm men qoǵamdyq tártipti buzý áreketterimen kúres jalǵasyp jatyr. Qalalyq polıtsııa qyzmetkerleri qurylys alańynda turǵan birneshe kólikke zaqym keltirgen jasóspirimderdi anyqtady.

Anyqtalǵandaı, kólikter jaqyn mańdaǵy turǵyn úılerdiń turǵyndaryna tıesili bolǵan jáne uzaq ýaqyt boıy sol aýmaqta turǵan.

Bótenniń múlkin búldirý faktisi boıynsha qylmystyq is qozǵaldy. Qazirgi tańda kólik ıelerine kelgen materıaldyq shyǵyn mólsheri eseptelip jatyr.

Tergeý nátıjesinde jasóspirimderdiń zańdy ókilderi — ata-analary ákimshilik jaýapkershilikke tartylady. Sonymen qatar balalardyń áreketi Astana qalasy ákimdigi janyndaǵy balalardyń quqyqtaryn qorǵaý jónindegi komıssııada qaralatyn bolady.

Polıtsııa ata-analarǵa balalarynyń bos ýaqytyn baqylaýda ustap, zańǵa qaıshy áreketterdiń saldaryn túsindirý jumystaryn júrgizýdiń mańyzyn eskertedi.

«Zań jáne tártip» baǵdarlamasy aıasynda elordalyq polıtsııa men prokýratýra birlesip, vandalızmmen kúresti belsendi jalǵastyryp jatyr. Bóten múlikti ádeıi joıý nemese búldirý 60 aılyq eseptik kórsetkishke deıin aıyppul salýǵa nemese 30 táýlikke deıin ákimshilik qamaýǵa ákep soǵýy múmkin.

2025 jyldyń basynan beri 80-nen astam adam ákimshilik jaýapqa tartyldy: olardyń 57-si qamaýǵa alynyp, 28-ine 4 mıllıon teńgeden astam aıyppul salynǵan.

Qalada «Stop, vandal!» atty aldyn alý aktsııasy jalǵasýda. Onyń aıasynda kúndizgi jáne túngi reıdter, halyqpen túsindirý jumystary, sondaı-aq eriktilerdiń, qoǵam belsendileriniń jáne belgili sportshylardyń qatysýymen sharalar ótýde. Aktsııanyń basty maqsaty — vandalızmniń aldyn alyp, qalanyń múlkin qorǵaý.

Aıta ketelik Astanada sýǵa shomylý erejeleri túsindirilgen edi.