Astanada jasóspirimder dendropark aýmaǵynda zertteý júrgizdi
ASTANA. KAZINFORM — Astanadaǵy Ortalyq saıabaqta Nura aýdanynyń ákimi Rıshat Turdybekovtiń qatysýymen Urbanitarium Astana 2025 jobasynyń qorytyndysy tanystyryldy. Іs-shara barysynda jasóspirimder dendropark aýmaǵynda júrgizilgen zertteý nátıjelerimen bólisti, dep habarlaıdy elorda ákimdiginiń resmı saıty.
Urbanitarium Astana – ýrbanıstıka men ekologııaǵa qyzyǵatyn 13-17 jas aralyǵyndaǵy jasóspirimderge arnalǵan bilim berý jobasy. Joba maýsym men tamyz aılary aralyǵynda «Dala qalasy, aǵash jáne adam» atty tegin bilim berý baǵdarlamasynyń aıasynda júzege asyrylǵan. Osy úsh aı ishinde Astananyń 350-den astam jasóspirimi qazaqstandyq sarapshylardyń jetekshiligimen ýrbanıstıka men ekologııanyń teorııalyq jáne praktıkalyq negizderin meńgergen.
Joba sheńberinde Urbanitarium Astana klýbynyń músheleri bıolog-kýratorlar Alena Koshkına men Rýslan Orazalıevtiń jetekshiligimen Astana dendroparkiniń aýmaǵyn zerttegen. Jas zertteýshiler parktiń florasyn kartaǵa túsirip, faýnany júıeli túrde baqylap otyrǵan jáne Zertteý nátıjesinde 9 gektar aýmaqty qamtıtyn dendropark aýmaǵynan 200-den astam ósimdik pen janýar túrin anyqtaǵan.
- Astana dendroparki – elorda ortalyǵyndaǵy tabıǵı landshafty saqtap qalǵan sırek aýmaqtardyń biri. Ol 1962 jyly Tabıǵatty qorǵaý qoǵamynyń bastamasymen, qalanyń eń kóne saıabaǵynyń (130 jyldan astam tarıhy bar) jalǵasy retinde qurylǵan. Búginde dendropark – elordanyń bıoalýantúrliligin saqtaýda mańyzdy ról atqaratyn erekshe nysan. Tabıǵı jáne mádenı qundylyqtardyń úılesimi retinde ol qalanyń ekologııalyq turaqtylyǵyn qamtamasyz etýde mańyzdy oryn alady, – dedi joba tanystyrýshysy Raqat Jaýyn.
Prezentatsııa sońynda qatysýshylar sarapshylar men qonaqtardan keri baılanys alyp, Nura aýdanynyń ákimi men shaqyrylǵan jurtshylyqqa dendropark aýmaǵy boıynsha ekskýrsııa ótkizdi.