Astanada jasóspirimder Olımpıadasynyń jeńimpazdaryna aqshalaı syıaqylar tabystaldy
ASTANA. QazAqparat - Astanada ІІІ jasóspirimder Olımpıadasynyń chempıondary men júldegerlerine qurmetteý kórsetý sharasy ótti. Jıynǵa QR Ulttyq olımpıadalyq komıtetiniń prezıdenti Tımýr Qulybaev pen QR Mádenıet jáne sport mınıstriArystanbek Muhamedıuly qatysty, dep habarlaıdy QazAqparat Olympic.kz saıtyna silteme jasap.
QR Úkimetiniń qaýlysyna sáıkes, 2018 jylǵy jasóspirimder Olımpıadasynda joǵary nátıje kórsetken chempıondar men júldegerlerge kelesideı kólemde syıaqy beriledi: «altyn» úshin $10 000, «kúmis» úshin $5 000 jáne «qolaǵa» $3 000. Sondaı-aq jeńimpazdardyń bapkerlerine de qarjylaı syıaqy qarastyrylǵan.
«Sizder halyqaralyq dodalar men Azııa chempıonattarynda kózge túsip, jasóspirimder Olımpıadasy sekildi keshendi jarysta alǵash ret baq synadyńyzdar. Bul úlken tájirıbe. Al bir-birlerińe qoldaý kórsetip, bir tý astynda birikkenderiń - biz úshin úlken qýanysh. Sizder tutas komandaǵa aınalyp, Ulttyq Olımpıadalyq komıtettiń basty maqsatyn júzege asyrdyńyzdar», - dedi QR UOK prezıdenti Tımýr Qulybaev.
Eske salaıyq, Býenos-Aıreste Qazaqstan quramasy tórt altyn, úsh kúmis jáne úsh qola medal jeńip alǵan bolatyn. Odan bólek, halyqaralyq komandalar sapynda kúmis jáne qola júlde ıelendi.
Argentınada el namysyn sporttyń 23 túrinen 58 atlet qorǵady.
Kelesi jasóspirimder Olımpıadasy 2022 jyly Senegalda ótedi.
Jasóspirimder Olımpıadasynyń chempıondary:
Bekarys Sádýaqas (dzıýdo), Dıas Bahraddın (eskek esý), Gleb Brýsenskıı men Evgenıı Fedorov (velosport), Aıbek Oralbaı (boks).
Kúmis júldegerler: Damır Toıbaı (boks), Talǵat Shaıken (boks), Margarıta Grıtsenko (dzıýdo).
Qola júldegerler: Nadejda Rıabets (boks), Stella Sýhanova (eskek esý), Ábilmansur Batyrǵalı (karate).
Halyqaralyq komanda sapynda Roza Ábıtova (kórkem gımnastıka) kúmis, Bekarys Sádýaqas (dzıýdo) qola medal jeńip aldy.
