Astanada jasóspirimder arasyndaǵy voleıboldan QR Chempıonatynyń ІІ týry bastaldy
ASTANA. Qańtardyń 5-i. QazAqparat /Gúlmıra Álıakparova/ - Búgin Astanadaǵy L.Gýmılev atyndaǵy Eýrazııa Ulttyq ýnıversıtetiniń «Eýrazııa» sport zalynda 1992-1993 jáne 1994-1995 jyldary týǵan jasóspirimder arasyndaǵy voleıboldan Qazaqstan Respýblıkasy Chempıonatynyń ІІ týrynyń ashylý rásimi boldy,
dep habarlaıdy QazAqparat.
QR eńbegi sińgen jattyqtyrýshy Qabdyýahıt Jaıdarovtyń aıtýynsha, chempıonattyń 2009-2010 jylǵy maýsymy 6 kúnge sozylady jáne oǵan Qazaqstannyń barlyq aımaqtarynan barlyǵy 27 komanda (eresek topta - 12, kishi topta - 15) qatysady.
Sondaı-aq Q.Jaıdarov, ótken jylǵy kúzgi chempıonattyń nátıjesi boıynsha komandalar birneshe kishi toptarǵa bólingenin atap ótti. Olar atalmysh chempıonattyń aıasynda, ıaǵnı qańtardyń 5,6-sy jáne 7-si kúnderi ózara oınap, jeńimpazdardy anyqtaıtyn bolady. Al chempıonattyń júldeli oryndary úshin aqtyq syn qańtardyń 8,9-y jáne 10-y kúnderi ótedi.
Jarys oıyndary «Eýrazııa» sport zalynda jáne Polıtehnıkalyq kolledjiniń ǵımaratynda ótedi.
