Astanada jasóspirimder arasynda bokstan Álem chempıonatynyń alǵashqy kúni ótti

Atap aıtqanda, 48, 52, 57 jáne 63 keli salmaq dárejeleri boıynsha aldyn ala saıystar ótti. Onda óner kórsetkenderdiń ishinde Mońǵolııa, Túrkııa, Ýkraına, Ózbekstan jáne Reseı elderinen kelgen jasóspirim boksshylardyń deńgeıin erekshe atap ótýge bolady.

Qazaqstan quramasy sapynan sharshy alańǵa ázirshe tek 57 keli salmaq dárejesindegi boksshy Erbolat Ermekov shyqty. Ol Tájikstan sportshysy Shavkat Rahımovpen kezdesip, qarsylasyn 23-17 esebimen tize búktirdi.

Boksshylardyń aldyn ala kezdesýleri barysynda, birinshiliktiń saltanatty ashylý rásimi de uıymdastyryldy. Álem chempıonatynyń shymyldyǵyn QR Premer-Mınıstri Kárim Másimov, Halyqaralyq áýesqoı boks qaýymdastyǵynyń (AIBA) prezıdenti Chıng-Kýo Vý jáne Qazaqstannyń boks qaýymdastyǵynyń basshysy Tımýr Qulybaev ashty.

«Osynaý iri boks dodasynyń elimizde ótkizilýi tuńǵysh ret. Mundaı shara keleshekte elimizde eresekter arasynda bokstan álem chempıonatyn qabyldaý múmkindigin ıelenýge septigin tıgizedi», - dedi Úkimet basshysy K. Másimov.

Bul jarysqa qatysýǵa bizdiń elimizge álemniń 50 elinen 500-den astam sportshy keldi. Chempıonatta Qazaqstan namysyn 13 jas boksshy qorǵaıdy. Respýblıkanyń jastar quramasynyń aǵa jattyqtyrýshysy - Sultan Kostoev. Chempıonattyń fınaly 30 shildege josparlanǵan.

Otandyq boks tarıhynda mundaı aýqymdaǵy týrnır Qazaqstanda alǵash ret ótkizilýde. QR Týrızm jáne sport mınıstrligi, Qazaqstannyń boks federatsııasy men elorda ákimdigi jarystardyń óte joǵary deńgeıde ótkizilýine bar kúsh-jigerdi jumsaýda.

Uıymdastyrýshylardyń aıtýynsha, Astana boks týrnırin ótkizý otandyq boksty damytýǵa jańa serpin berip, jastardyń sportpen shuǵyldanýyna qyzyǵýshylyǵyn arttyra túsedi.