Ortalyq Azııa elderi «Jasyl mektep» platformasyn iske qosýdy talqylady
ASTANA. KAZINFORM — Astanada 22-24 sáýir aralyǵynda ótetin 2026 jylǵy Óńirlik ekologııalyq sammıt (RES 2026) qarsańynda elordada Ortalyq Azııa elderiniń beıindi mınıstrlikteri ókilderiniń, halyqaralyq uıymdar men sarapshylardyń qatysýymen joǵary deńgeıdegi daıyndyq keńesi ótti.
Ekologııa jáne tabıǵı resýrstar mınıstrligi baspasóz qyzmetiniń aqparatyna sáıkes, keńestiń basty taqyryby «Jasyl mektep» óńirlik platformasyn — Qazaqstan Úkimeti men ıÝNISEF qoldaýymen jumys isteıtin jáne óńirlik deńgeıde úılestiriletin bastamany talqylaý boldy. Ol Ortalyq Azııa elderiniń ekologııalyq turaqty bilim berý júıelerine kóshýin qoldaýǵa arnalǵan. Platforma klımattyq bilim berýdi ilgeriletý, klımatqa tózimdi mektep ınfraqurylymyn damytý, jastardyń bastamalaryn qoldaý jáne bilim berý sektorynda basqarý jáne qarjylandyrý júıelerin nyǵaıtý úshin úkimetterdi, damý seriktesterin jáne halyqaralyq qarjy ınstıtýttaryn biriktiredi.
Platforma RES 2026 barysynda bekitiledi dep josparlanyp otyr jáne bilim almasýdy ulttyq saıasattarmen jáne ınvestıtsııalyq sheshimdermen, sonyń ishinde ulttyq deńgeıde aıqyndalatyn salymdar (ONÝV) 3.0. sheńberinde elderdiń mindettemelerin iske asyrýmen baılanystyratyn óńirlik yntymaqtastyqtyń erikti tetigi bolady.
Keńeske qatysýshylar bilim berýdiń aımaq aldynda turǵan klımattyq syn-qaterlerge negizgi jaýaptardyń biri retindegi rólin talqylady.
Keńeste QR Ekologııa jáne tabıǵı resýrstar mınıstri Erlan Nysanbaev quttyqtaý sóz sóılep, Qazaqstan klımattyq jáne ekologııalyq kún tártibin dáıekti túrde ilgeriletip kele jatqanyn jáne óńirlik sheshimderdi iske qosý alańyna aınalýǵa daıyn ekenin atap ótti.
— Qazaqstan bilim berýdi turaqty damý men uzaq merzimdi klımattyq sheshimderdiń negizgi elementi retinde qarastyrady. Biz RES 2026-da «Jasyl mektep» óńirlik platformasyn qabyldaýǵa jáne onyń búkil óńirdiń múddesi úshin damýyna járdemdesýge daıynbyz, — dep atap ótti mınıstr.
ıÝNISEF-tiń Qazaqstandaǵy ókili doktor Rashed Mustafa Sarvar Qazaqstan BUU RKIK sheńberinde usynylǵan ONÝV 3.0-ge klımattyq bilim berý jáne jastardyń qatysýy máselelerin engizgenin atap ótti.
— Bul Qazaqstannyń klımattyq saıasaty bolashaq urpaqqa baǵyttalǵanyn kórsetedi. «Jasyl mektep» aımaqtyq platformasy bul mindettemelerdi mektepter men balalardyń ómirindegi naqty ózgeristerge aınaldyrýǵa kómektesedi, — dedi ol.
QR Oqý aǵartý birinshi vıtse-mınıstri Maıra Meldebekova óńirdiń bilim berý júıeleri úshin bastamanyń mańyzdylyǵy týraly aıtty.
— «Jasyl mektep» óńirlik platformasy mektepterdi ınfraqurylymnan bastap bilim berý mazmunyna deıin júıeli túrde jańartý úshin múmkindikter jasaıdy. Biz úshin balalardyń qaýipsiz, salaýatty ortada oqýy jáne ózgermeli klımatta ómir súrý jáne jumys isteý úshin qajetti bilim men daǵdylardy alýy mańyzdy, — dedi ol.
Daıyndyq keńesine Qazaqstan, Qyrǵyzstan, Tájikstan, Túrikmenstan jáne Ózbekstan ekologııa jáne bilim mınıstrlikteriniń ókilderi qatysty. Qatysýshylar «jasyl» mektepter men klımattyq bilim berý salasyndaǵy ulttyq basymdyqtar men tabysty tájirıbelerdi usyndy, sondaı-aq halyqaralyq uıymdarmen jáne kópjaqty damý bankterimen áriptestikti qosa alǵanda, yntymaqtastyq pen qarjylandyrý máselelerin talqylady. Sońynda qatysýshylar RES 2026 ótkizý alańyna jáne turaqty damý, jasyl energetıka jáne klımattyq turaqty ınfraqurylym salasyndaǵy sheshimder men tehnologııalar usynylatyn bolashaq kórme aımaǵyna bardy.
Daıyndyq keńesiniń nátıjeleri RES 2026 qorytyndy kún tártibin jáne bilim berý júıelerin nyǵaıtýǵa jáne klımattyń ózgerýi jaǵdaıynda balalardyń bolashaǵyn qorǵaýǵa baǵyttalǵan odan ári sheshimderdi qalyptastyrý kezinde paıdalanylatyn bolady.
Osydan buryn Qazaqstanda Óńirlik ekologııalyq sammıt ótetin kún belgilengenin jazǵanbyz.