Astanada jasandy ıntellektiniń kómegimen jasalǵan alǵashqy spektakl qoıyldy
ASTANA. KAZINFORM — Qazaqstan teatrynda alǵash ret mátin jazýdan bastap mýzyka men kostıým tańdaýyna deıin jasandy ıntellekt qoldanylǵan jańa formattaǵy «Jyly muń» dramasynyń premerasy usynyldy.
Rejısser ári avtor Nurjigit Mýslımov JI-men jumys jasaýdyń ereksheligi týraly oıyn aıtty.
— Stsenarııde qateleri boldy, biraq biz túzetip, sahnaǵa laıyqtap qaıta jınadyq. Mýzykasyna kelsek, tipti keı adamdardan da áserli jazylǵan jerleri bar — tyńdaǵan adamnyń júregine jetedi. Keıbir mátinder dramatýrg oılap tappaıtyn sózderdi de berip otyr. Qoıylymnyń negizi — nashaqorlyqqa qarsy kúres. JI bolashaǵy zor, odan qashpaı, kerisinshe tıimdi qoldanýdy úırenýimiz kerek. Eń úlken artyqshylyǵy — ýaqyt únemdeýi, — dedi qoıylym avtory men rejısseri Nurjigit Mýslımov.
Rejısserdiń aıtýynsha, qoıylym «Bolǵan oqıǵa» fılminiń jelisi boıynsha jazylǵan.
Qazaqstannyń eńbek sińirgen qaıratkeri Gúlmıra Jakılına qoıylymdaǵy ananyń rólin somdaıdy.
— Bul — aýyr taqyryp. Bala taǵdyryna alańdaǵan ananyń dármensizdigi, jalǵyzdyǵy kórsetiledi. JI jazǵan bir sóılem erekshe áser etti — «Eger men qulasam, balam da qulaıdy. Ol mensiz tura almaıdy». JI-diń jany bolmasa da, keı sózderi adamnyń júregine ótedi. Biraq qalaı bolsa solaı oqyp berý jetkiliksiz — akter ony jan bitirip, kórermenge jetkizýi kerek, — dedi aktrısa.
Premeraǵa qatysqan Astana qalasy polıtsııa departamenti esirtki qylmysyna qarsy is qımyl basqarmasynyń bólimshe bastyǵy, polıtsııa podpolkovnıgi Álııa Qıbatqyzy nashaqorlyqqa qarsy kúres boıynsha málimet berdi.
— Jyl basynan beri elordada 400-den astam esirtki qylmysy anyqtaldy. 270-i — esirtki satýshylarǵa qatysty. 450 kg astam esirtki tárkilendi, onyń 40 kg — sıntetıkalyq zattar, — dedi ol.
«Jyly muń» dramasynyń premerasy Astana qalasyndaǵy Ázirbaıjan Mámbetov atyndaǵy memlekettik drama jáne komedııa teatrynda ótti.
Aıta keteıik, Astanada Abaıdyń 180 jyldyǵyna arnalǵan aqynnyń qara sózderine negizdelgen qoıylymnyń premerasy ótkenin jazdyq.
Kámılá Múlik