Astanada jasandy ıntellekt negizinde jumys isteıtin jańa tsıfrlyq keńse ashyldy
ASTANA. KAZINFORM – Elordada memlekettik qyzmetterdi óz betinshe alýǵa múmkindik beretin jańa býyndaǵy tsıfrlyq keńse – Smart Point ashyldy, dep habarlaıdy Jasandy ıntellekt jáne tsıfrlyq damý mınıstrligi.
Jańa formattaǵy keńse Apple Store qaǵıdatyna negizdelgen. Munda azamattardyń memlekettik qyzmetterdi ózdiginen alýyna basymdyq berilgen.
«Azamattarǵa arnalǵan úkimet» memlekettik korporatsııasynyń qyzmetkerleri kelýshilerge tsıfrlyq servısterdi paıdalaný boıynsha keńes berip, qajetti qyzmetti rásimdeýge kómektesedi.
Jańa keńseniń jumysymen QR Premer-Mınıstriniń orynbasary – Jasandy ıntellekt jáne tsıfrlyq damý mınıstri Jaslan Mádıev tanysty.
– Memlekettik qyzmetterdi tsıfrlyq sheshimder men jasandy ıntellekt tehnologııalary negizinde kórsetýdiń jańa modelin qalyptastyrý mańyzdy. Smart Point sııaqty formattar halyqqa qyzmet kórsetý ortalyqtarynyń jumysyn jańa deńgeıge kóteredi. Búgingi tańda osy úlgini keńinen engizý – basty mindetterdiń biri, – dedi Jaslan Mádıev.
Smart Point keńsesinde qyzmet alýshylar memlekettik qyzmetterdi onlaın rásimdeýge arnalǵan kompıýterlerdi paıdalana alady.
Sonymen qatar dıalog formatynda jumys isteıtin eGovGPT kópagentti jasandy ıntellekt platformasy qajetti memlekettik qyzmetti anyqtap, ony onlaın rásimdeýge kómektesedi.
Jańa tsıfrlyq keńsede qujattandyrý termınaly arqyly jeke kýálik nemese pasport alýǵa ótinish berýge bolady. Sondaı-aq tsıfrlyq servısterdi paıdalanýdy úıretetin oqý synyby men kútý aımaǵy qarastyrylǵan.
Smart Point-tiń basty erekshelikteriniń biri – qujattardy berýge arnalǵan aımaqtyń táýlik boıy jumys isteýi.
– Smart Point – halyqqa qyzmet kórsetýdiń zamanaýı formattaryn damytýǵa baǵyttalǵan júıeli jumysymyzdyń bir bóligi. Bizdiń maqsatymyz – tsıfrlyq tehnologııalardy memlekettik qyzmetterdi alýdyń tabıǵı ári qolaıly tetigine aınaldyrý, – dedi Memlekettik korporatsııanyń Basqarma Tóraǵasy Arman Kenjeǵalıev.
Aıta keteıik, Astanada memlekettik emhanalardyń máselelerin sheshýge arnalǵan Health AI hakatony bastaldy.
