Astanada jasalyp jatqan Batyrhan Shúkenovtiń músini Qyzylordada ornatylady
ASTANA. QazAqparat - Tanymal ánshi Batyrhan Shúkenovtiń jasalyp jatqan eskertkishiniń fotosy áleýmettik jelide jarııalandy. «QazAqparat» tilshisi atalǵan músinniń avtorymen habarlasyp, eskertkishtiń qaıda ornatylatynyn bildi.
Aıta keterligi, búgingi kúni ánshiniń músini Astana qalasyndaǵy «KazArtSıstem» jaýapkershiligi shekteýli seriktestiginiń músinshiler sheberhanasynda jasalyp jatyr. Eskertkishtiń bıiktigi 2,5 metr. Qazirgi kezde saz jumystary aıaqtalyp qalǵan. Endi qolaǵa aýdarý jumystary bastalmaq.
«Músindi jasap jatqanymyzǵa eki aıdaı ýaqyt boldy. Ótken jyly ótkizilgen konkýrsqa qatysyp, jeti-segiz jumystyń ishinen meniń jobamdy tańdap alǵan bolatyn. Eskertkish Qyzylorda ákimdiginiń tapsyrysymen jasaldy. Ashylýy mamyr aıyna josparlanǵan. Marqumnyń aǵasy Baýyrjan kelip, jumystardy kórip turady. Qolyna tenor-saksafondy ustattyq» - deıdi músin avtory, Qazaqstan Sýretshiler qaýymdastyǵynyń múshesi,
Qazaqstan Respýblıkasynyń óner akademııasynyń akademıgi Murat Mansurov.
Aıta keteıik, ataqty músinshi Murat Amangeldiuly Astana qalasyndaǵy «Qazaq eli», «Kereı men Jánibek», «Máńgilik El», «Qazaq handyǵyna - 550 jyl» jáne taǵy basqa da kóptegen monýmentterdiń avtory.
