Astanada jasalǵan qylmystardyń teń jartysyn óńirlerden kelgender jasap otyr - A. Daýylbaev
ASTANA. QazAqparat - Astanada jasalǵan qylmystardyń teń jartysy óńirlerden kelgenderdiń úlesine tıip otyr. Búgin Zańdylyqty qamtamasyz etý, quqyqtyq tártip jáne qylmyspen kúres jónindegi úılestirý keńesiniń kezekti otyrysynda QR Bas prokýrory Ashat Daýylbaev osylaı málim etti.
«Resmı statıstıkaǵa súıensek, Astanaǵa jyl saıyn ishki kóshi-qon arqyly 50 myńnan astam adam qonys aýdarady. Al resmı emes derekter bul kórsetkishtiń eń az degende eki esege artyq ekenin aıǵaqtaıdy», - deı kele Bas prokýror elordada azamattardy tirkeý isi de tıisti deńgeıde jolǵa qoıylmaǵanyn atap ótti.
«Astanadaǵy bir shaǵyn ǵana saıajaı ýchaskesinde 39 adam tirkeýge turǵan. Al sol saıajaı ıesiniń ózi tipti munshalyqty adamnyń tirkeýde turǵanyn bilmeıtin de bolyp shyqty. Elordadaǵy «Ońtústik Shyǵys» shaǵyn aýdanynda páter urlyǵy eń kóp jasalady. Al munda bar-joǵy eki ǵana ýchaskelik ınspektor qyzmet etip júr. Bul rette bir ýchaskelik ınspektorǵa túsetin shekteýli aýyrtpashylyq 2,5-3 myń adamdy quraý kerek bolsa, ondaǵy polıtseılerge tıetini 20 myń turǵynǵa deıin jetedi», - dedi Úılestirý keńesiniń otyrysynda Bas prokýror.
