Astanada «Jas ulan» mektebiniń túlekterine dıplomdar tabys etildi
ASTANA. 7 maýsym. QazAqparat - Búgin elordada «Otan qorǵaýshylar» alańynda general Saǵadat Nurmaǵambetov atyndaǵy «Jas ulan» mektebiniń 56 túlegine orta bilim týraly dıplomdar saltanatty jaǵdaıda tabystaldy.
Shara kezinde ulandar «Otan Ana» monýmentine gúlshoqtaryn qoıyp, saltanatty marshpen júrip ótti. Eń úzdik 15 oqýshyǵa qundy syılyqtar men gramotalar berildi. Shara sońynda QR Qorǵanys mınıstrliginiń Qurmetti qaraýylynyń úlgilik kórsetilimi boldy.
QR Qorǵanys mınıstrligi bas ınspektsııasynyń bastyǵy Qurban Qarajanovtyń aıtýynsha, búginde mektepte respýblıkanyń 14 oblysynan túrli ultty 11 oqýshy bilim alýda.
«Bıyl UBT tapsyrý keezinde «Jas ulan» oqýshylary jaqsy nátıje kórsetti. Olar ortasha eseppen 80,4 ball aldy. Onyń ishinde mektep tarıhynda alǵash ret «Altyn belgi» ıegeri atanǵan Talǵat Seısenovtyń nátıjesi joǵary boldy», - deıdi ol.
«Sizder - Qazaqstannyń maqtanyshy. Tańdaǵan joldaryńyzdy abyroımen atqaryp, tek alǵa umtylýlaryńyz kerek», - dedi Q. Qarajanov saltanatty jıynda.
Mekteptiń eń alǵashqy túlekteri 2002 jyly túlep ushqan bolatyn. On jyl ishinde 529 oqýshy mektep qabyrǵasynan shyqty. Qazir olardyń deni Reseı, Túrkııa, Qazaqstan, Germanııa men Belarýs Qorǵanys mınıstrlikteriniń oqý oryndarynda bilim alýda.
