Astanada jas sýretshilerdiń týyndylarynyń kórmesi ótti - fotoreportaj
ASTANA. KAZINFORM – Beıbitshilik jáne Kelisim saraıynyń «Qulanshy» zamanaýı óner ortalyǵynda Qazaq KSR halyq sýretshisi Ábilhan Qasteevtiń 120 jyldyǵyna arnalǵan Qazaq ulttyq óner ýnıversıtetiniń kórkemsýret fakýlteti stýdentteriniń shyǵarmashylyq jumystarynyń kórmesi ótti.
Kórmege úzdik degen týyndylar iriktelgen. Ártúrli janrda salynǵan sýretter á degennen kórermenderdi baýrap aldy.
Jas sýretshi Erasyl Orazdyń kórmegen birneshe týyndysy qoıylypty. Ásirese, Shoqan Ýálıhanovty beınelegen sýreti jınalǵandardyń joǵary baǵasyn aldy.
«Bul sýretti salýǵa 2 apta ýaqytymdy jumsadym. Óz oıyńnan salǵan sýretten bireýdiń sýretin qaǵazǵa túsirý jeńilirek. Bul rette, Ábilhan atamyzdyń Shoqan Ýálıhanovty beınelegen sýretin salý qıynǵa soqpady. Shamam kelgenshe Shoqan atamyzdyń beınesin shynaıy keltirýge tyrystym. Árıne, sýret ónerinen habary az adamdarǵa syrttaı bári tamasha kóringenimen úırenerimiz kóp. Gýashpen salynǵan sýret kórermenderdiń kóńilinen shyqqanyna qýanyshtymyn. Kádimgideı shabyttanyp otyrmyn», - deıdi Erasyl.
Kórermenderdiń ystyq yqylasyna bólengen taǵy bir sýrettiń avtory – Madına Orazaeva.
Onyń Ábilhan Qasteevti beınelegen sýreti alystan kóz tartady.
«Bul sýret maıly boıaýmen salyndy. Týyndyny bir semestr boıy, ıaǵnı jarty jyl saldym. Bul – meniń alǵashqy iri kórmem. Jınalǵandar sýretti joǵary baǵalap jatqanyna qýanyshtymyn», - deıdi Madına.
«Qulanshy» óner ortalyǵynyń jetekshisi Láıla Mahat jyl saıyn 14 mamyr kúni Qazaq ulttyq óner ýnıversıtetiniń kórkemsýret fakýlteti stýdentteriniń shyǵarmashylyǵyna arnalatynyn jetkizdi.
«Elimizde talantty balalar kóp. Olar tasada qalmaı, shyǵarmashylyq qabiletin shyńdaýǵa tıis. Ásirese, Qazaq ulttyq óner ýnıversıtetine respýblıkanyń túkpir-túkpirinen daryndy stýdentter jınalǵan. Biz óz tarapymyzdan talantty jastardy qoldaýǵa daıynbyz», - dedi ol.
Kórme barysynda Qazaq ulttyq óner ýnıversıtetiniń stýdentteri sán kórsetilimin de uıymdastyrǵanyn atap ótken jón.
