Astanada jas sportshylar baıdarka men kanoede baq synady
ASTANA. KAZINFORM — Elorda kúnine oraı Astanada baıdarka jáne kanoede esýden qalalyq chempıonat ótti, dep habarlaıdy qala ákimdiginiń resmı saıty.
«Tolqyn» sport kesheniniń mańyndaǵy esý arnasynda uıymdastyrylǵan jarysqa 2012-2015 jyly týǵan 50-ge jýyq jas sportshy qatysyp, Qazaqstan chempıonatyna joldama úshin baq synady.
Jarystyń ashylý saltanatyna Astana qalasy Almaty aýdanynyń ákimi Rústem Táýekelov qatysyp, elordada eskek esý sportynyń qarqyndy damyp kele jatqanyn atap ótti.
— Eskek esý sporty elordada 2000 jyldan beri qarqyndy damyp keledi. Búginde Astanada zamanaýı sporttyq bazalar jumys isteıdi. Olımpıadalyq rezervtiń mamandandyrylǵan balalar-jasóspirimder sport mektebinde bolashaq chempıondardy daıarlaý júıeli túrde júrgizilýde. Osy eńbektiń nátıjesinde elordalyq sportshylar Azııa chempıonattary men halyqaralyq jarystarda joǵary nátıje kórsetip, Qazaqstannyń abyroıyn asqaqtatyp júr. Búgingi jarys elorda kúnine oraı uıymdastyrylǵan, — dedi Rústem Táýekelov.
Chempıonat barysynda sportshylar K1 jáne C1 sanattary boıynsha 200 jáne 500 metr qashyqtyqta synǵa tústi. Baıdarka men kanoe syrt kózge uqsas bolǵanymen aıyrmashylyǵy bar. Baıdarkada sportshy otyryp, eki júzdi eskekpen júzse, kanoede bir tizesin tirep, bir júzdi eskekpen jarysady.
Bul jarys Qazaqstan chempıonatyna irikteý kezeńi sanalady. Úzdik nátıje kórsetken 15 sportshy Jezqazǵanda ótetin el birinshiliginde Astana qalasynyń namysyn qorǵaıdy.
— Búgingi jarysqa 50-ge jýyq jas sportshy qatysyp jatyr. Bul — Qazaqstan chempıonatyna irikteý kezeńi. Osy jarysta úzdik shyqqan 15 sportshy Astana qalasynyń namysyn qorǵap, Jezqazǵanda ótetin Qazaqstan chempıonatyna joldama alady. Al el birinshiliginiń qorytyndysy boıynsha Azııa jáne álem chempıonattaryna qatysatyn ulttyq qurama jasaqtalady. Jarysqa qatysyp otyrǵan sportshylardyń barlyǵy № 4 mamandandyrylǵan olımpıadalyq rezervtegi balalar men jasóspirimder sport mektebiniń tárbıelenýshileri. Bıylǵy 4–7 maýsym aralyǵynda Túrkistan qalasynda ótken Azııa chempıonatynda mektebimizdiń sportshylary joǵary nátıje kórsetip, 8 medal jeńip aldy. Onyń ishinde 5 altyn jáne 3 kúmis júlde bar. Bul kórsetkish elordadaǵy eskek esý sportynyń qarqyndy damyp kele jatqanyn aıǵaqtaıdy. Búgingi jarysqa 2012–2015 jyldary týǵan uldar men qyzdar qatysýda, — dedi Astana qalasy ákimdiginiń № 4 balalar men jasóspirimderdiń mamandandyrylǵan olımpıadalyq rezerv sport mektebiniń basshysy Muhamed-Rahım Ibraev.
Budan buryn elimizde sport mamandaryn daıarlaý isi jańa deńgeıge kóteriletinin jazǵanbyz.
